tu jaan-e-mohabbat hai magar teri taraf bhi — Saqi Faruqi

vo miri ruuh ki uljhan kaa sabab jaantaa hai
jism ki pyaas bujhaane pe bhi raazi niklaa

duniyaa pe apne ilm ki parchhaaiyaan na Daal
ai raushni-farosh andheraa na kar abhi

khaak main us ki judaai mein pareshaan phirun
jab ki ye milnaa bichhaDnaa miri marzi niklaa

hairaani mein huun aakhir kis ki parchhaain huun
vo bhi dhyaan mein aayaa jis kaa saaya koi na thaa

pyaas baDhti jaa rahi hai bahtaa dariyaa dekh kar
bhaagti jaati hain lahrein ye tamaashaa dekh kar

haadsa ye hai ki ham jaan na moattar kar paae
vo to khush-bu thaa use yuun bhi bikhar jaanaa thaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

ham to apnon se bhi begaana hue ulfat mein
tum jo ghairon se mile tum ko na ghairat aai

ik sadma-e-mohabbat ik sadma-e-judaai
ginti ke do hain lekin laakhon ki jaan par hain

pichhaa kisi tarah ye miraa chhoDtaa nahin
haathon se ishq ke koi jaave kahaan nikal