tamannaaon mein uljhaayaa gayaa huun — Shad Azimabadi

jab kisi ne haal puchaa ro diyaa
chashm-e-tar tu ne to mujh ko kho diyaa

iid mein iid hui aish kaa saamaan dekhaa
dekh kar chaand jo munh aap kaa ai jaan dekhaa

naazuk thaa bahut kuchh dil meraa ai 'shaad' tahammul ho na sakaa
ik Thes lagi thi yuun hi si kiyaa jald ye shisha TuuT gayaa

talab karein bhi to kyaa shai talab karein ai 'shaad'
hamein to aap nahin apnaa muddaaa maalum

dekhaa kiye vo mast nigaahon se baar baar
jab tak sharaab aai kai daur ho gae

izhaar-e-muddaaa kaa iraada thaa aaj kuchh
tevar tumhaare dekh ke khaamosh ho gayaa

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

huaa main rind-mashrab khaak mar kar is tamannaa mein
namaaz aakhir paDheinge vo kisi din to tayammum se

nahin dair o haram se kaam ham ulfat ke bande hain
vahi kaaba hai apnaa aarzu dil ki jahaan nikle

daastaan un ki adaaon ki hai rangin lekin
is mein kuchh khun-e-tamannaa bhi hai shaamil apnaa

hamein di jaaegi phaansi hamaare apne jismon mein
ujaaDi hain tamannaaon ki laakhon bastiyaan ham ne