jo motiyon ki talab ne kabhi udaas kiyaa — Shakeb Jalali

dil saa anmol ratan kaun kharidegaa 'shakeb'
jab bikegaa to ye be-daam hi bik jaaegaa

rote hain dil ke zakhm to hanstaa nahin koi
itnaa to faaeda mujhe tanhaaiyon se hai

khud apni aag se shaayad gudaaz ho jaaein
paraai aag se kab sang-dil pighalte hain

ham-safar rah gae bahut pichhe
aao kuchh der ko Thahar jaaein

jaati hai dhuup ujle paron ko sameT ke
zakhmon ko ab ginungaa main bistar pe leT ke

aalam mein jis ki dhuum thi us shaahkaar par
dimak ne jo likhe kabhi vo tabsire bhi dekh

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

sab ke so jaane pe aflaak se kyaa kahtaa hai
raat ko ek parinde ki sadaa suntaa huun

larazti chhat shikasta baam-o-dar se baat karni hai
mujhe tanhaai mein kuchh apne ghar se baat karni hai

jis sadi mein vafaa kaa chalan hi nahin
ham banaae gae us sadi ke liye