kuchh itne diye hasrat-e-didaar ne dhoke — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

khvaahishein khvaab dikhaati hain tire milne kaa
khvaab se kah de ki taabir ki surat aae

ghaur se dekh gulshan-e-duniyaa
har taraf khvaahishon kaa daldal hai

kitni khvaahishein dil mein palti hain magar 'naahid'
haath hi naiin aate bhaagte hue lamhe

baDhte hi jaa rahe hain tufaan khvaahishon ke
hoti hi jaa rahi hai mujh mein kami tumhaari

hasraton kaa dil se qabza uTh gayaa
ghaasibon ki hukmraani khatm hai