roz ye khvaab Daraataa hai mujhe — Vikas Sharma Raaz

muddatein ho gaiin hisaab kiye
kyaa pataa kitne rah gae hain ham

iraada to nahin hai khud-kushi kaa
magar main zindagi se khush nahin huun

dekhnaa chaahtaa huun gum ho kar
kyaa koi DhunD ke laataa hai mujhe

jise dekho ghazal pahne hue hai
bahut sastaa ye zevar gayaa hai

asar hai ye hamaari dastakon kaa
jahaan divaar thi dar ho gayaa hai

mujh ko aksar udaas karti hai
ek tasvir muskuraati hui

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

jhaankte raat ke garebaan se
ham ne sau aaftaab dekhe hain

koi mahkaar hai khushbu ki na rangon ki lakir
ek sahraa huun kahin se bhi guzar jaa mujh mein

pilaa saaqiyaa mai-e-jaan pilaa ki main laaun phir khabar-e-junun
ye khirad ki raat chhaTe kahin nazar aae phir sahar-e-junun