sar-e-bazm mujh ko uThaa diyaa mujhe maar maar liTaa diyaa — Zia

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

mujhe apni biivi pe fakhr hai mujhe apne saale pe naaz hai
nahin dosh donon kaa is mein kuchh mujhe DaanTtaa koi aur hai

khush hote hain ham log agar koi hasina
is umr ham par koi tohmat hi lagaae

jaane kaa naam hi nahin letaa vo nek-bakht
''muddat hui hai yaar ko mehmaan kiye hue''

mere taayaa se vo hain umr mein das saal baDi
ghar ke har fard pe dahshat hai miri taai ki

vo bhari bazm mein kahti hai mujhe uncle-ji
diplomacy hai ye kaisi miri ham-saai ki

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

aasmaan jhaank rahaa hai 'khaalid'
chaand kamre mein mire utraa hai

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe