Ghazal

"jaise is basti se naaraaz khudaa lagtaa hai apnaa hi gaanv mujhe aaj buraa lagtaa hai chaand ki sath pe patthar ke sivaa kuchh bhi nahin duur se dekho to har chehra bhalaa lagtaa hai chand baaton se samajh lete hain ham insaan ko chand maujon se hi tufaan kaa pataa lagtaa hai dekhne vaali nigaahon se jo dekho us ko chaandni raat mein suraj ki hayaa lagtaa hai ek hi shakhs kaa har vaqt tasavvur 'daanish' us se kyaa rishta hai kyaa naata hai kyaa lagtaa hai"

"khushi kaa naam sunaa hai magar khushi kyaa hai tire baghair jo guzre vo zindagi kyaa hai mujhe bhi kuchh to samajh aae zindagi kyaa hai khudaa kare tu samajh le ki dosti kyaa hai jabin hai naqsh-e-kaf-e-paa-e-yaar par vaaiz ab is se baDh ke bataa aur bandagi kyaa hai gham-o-khushi to bas ehsaas ki amaanat hain jahaan mein varna alam kyaa hai aur khushi kyaa hai main aaj tak ise samjhaa nahin huun ai 'daanish' ki dushmani kise kahte hain dushmani kyaa hai"

"dil ki basti ko masarrat se sajaae rakhiye yaar ke gham ko muqaddar hi banaae rakhiye zauq-e-didaar ko kuchh aur baDhaae rakhiye chaand se chehre ko chilman mein chhupaae rakhiye kal bichhaD jaaein to rah jaaeingi yaadein baaqi aaj to saare hijaabaat uThaae rakhiye ye vo daulat hai jo qismat se milaa karti hai pyaar ke dard ko siine se lagaae rakhiye phir andhere miri raahon mein na aa jaaein kahin apni ulfat se mire dil ko jalaae rakhiye chashm-e-duniyaa ko kahaan diid kaa haasil hai shu'ur ru-e-raushan ko hijaabon mein chhupaae rakhiye dil-e-'daanish' na hamesha ke liye ruk jaae aap siine se zaraa haath lagaae rakhiye"

"har dard ko maazi ki qasam bhuul gae hain ham teri khushi ke liye gham bhuul gae hain phir ai sitam-ijaad koi taaza sitam kar ab ham tiraa andaaz-e-karam bhuul gae hain jis roz se ham aae hain maikhaane mein saaqi us din se rah-e-dair-o-haram bhuul gae hain naa-vaaqif-e-aadaab-e-vafaa aap hain lekin ilzaam ye ham par hai ki ham bhuul gae hain ilzaam kise dein ki ye qismat kaa likhaa thaa 'daanish' jo hamein ahl-e-karam bhuul gae hain"

"hangaama kis liye hai bapaa tere shahr mein kyaa phir koi gharib luTaa tere shahr mein har shakhs kar rahaa hai jafaa tere shahr mein jiine kaa aa rahaa hai mazaa tere shahr mein rangin subh-o-shaam the shab bhi hasin thi dil ko magar sukun na thaa tere shahr mein is tarh ahl-e-shahr ne mujh par sitam kiye rahtaa nahin ho jaise khudaa tere shahr mein ab khud se puchhtaa huun pataa apne gaanv kaa aisaa milaa vafaa kaa sila tere shahr mein 'daanish' ko tere pyaar ne ki dushmani 'ataa pahle koi raqib na thaa tere shahr mein"

"vo ik nigaah jo le kar miraa qaraar gai qasam khudaa ki miri 'aaqibat sanvaar gai tire karam ke hain qurbaan ai gham-e-dauraan miri hayaat ko shishe mein tu utaar gai hamaare dam se hi ranginiyaan chaman mein thiin hamaare vaaste roti hui bahaar gai main tujh ko paa na sakaa ye miraa muqaddar thaa tiri talaash masaafat miri sanvaar gai hazaar tark-e-mohabbat ke baa'd bhi 'daanish' usi ki samt nazar meri baar baar gai"

"sharm se us ne nigaahon ko milaane na diyaa zabt ne haal-e-dil-e-zaar sunaane na diyaa haae vo bazm jo qaaem thi hamaare dam se ham ko haalaat ne us bazm mein jaane na diyaa gham nahin apne nasheman kaa nishaan tak na rahaa barq ko ham ne gulistaan to jalaane na diyaa tark-e-ulfat kaa iraada to kiyaa thaa lekin dil ne daaman tiri yaadon se bachaane na diyaa aur kyaa rakhte bharam un ki jafaa kaa 'daanish' shikva barbaadi kaa lab par kabhi aane na diyaa"

"vaaiz tu agar un ke kuche se guzar jaae firdaus kaa manzar bhi nazron se utar jaae rudaad-e-shab-e-gham yuun Dartaa huun sunaane se mahfil mein kahin un ki surat na utar jaae ik vaada-e-fardaa ki ummid pe zinda huun ai kaash kisi surat ye raat guzar jaae kaabe hi ke raste mein mai-khaana bhi paDtaa hai uljhan mein ye rah-rau hai jaae to kidhar jaae tum un se milo 'daanish' ye dhyaan rahe lekin khuddaari-e-fitrat kaa ehsaas na mar jaae"

"ye kaise kah duun ki kuchh tum se vaasta hi nahin bichhaD ke tum se kahin aur dil lagaa hi nahin nazar milaa ke kiyaa be-niyaaz-e-hosh mujhe tumhaari nazron mein jaise ki kuchh huaa hi nahin mujhe sataaeingi kyaa gardishein zamaane ki main kal ke baare mein ai dost sochtaa hi nahin ye ahl-e-bazm mujhe dekhte hain hairat se main jis ko dekh rahaa huun vo dekhtaa hi nahin sukun-e-qalb-o-jigar luuT le gayaa 'daanish' ek aisaa shakhs ki jis ko main jaantaa hi nahin"

"ab nahin koi mire dil ko dukhaane vaalaa yaad aataa hai bahut ruuTh ke jaane vaalaa gardish-e-vaqt miTaa mujh ko magar yaad rahe phir nahin koi tiraa naaz uThaane vaalaa jab bhi aaegi miri yaad taDap jaaegaa apni mahfil ko mire baa'd sajaane vaalaa jis ki khaatir liye ilzaam jahaan ke main ne ye vahi shakhs hai munh pher ke jaane vaalaa koi mukhlis na milaa aisaa jahaan mein 'daanish' meri barbaadi pe do ashk bahaane vaalaa"

"kyaa khabar thi munharif ahl-e-jahaan ho jaaeinge hote hote mehrbaan naa-mehrbaan ho jaaeinge muskuraa kar un kaa milnaa aur bichhaDnaa ruuTh kar bas yahi do lafz ik din daastaan ho jaaeinge ishq saadiq hai to apne azm-e-manzil ki qasam har qadam par saath laakhon kaarvaan ho jaaeinge ye maaal-e-ishq hogaa ye kise maalum thaa dil ke naghme ek din aah-o-fughaan ho jaaeinge gar tarannum par hi 'daanish' munhasir hai shaairi phir to duniyaa bhar ke shaair naghma-khvaan ho jaaeinge"

"zindagi kar gai tufaan ke havaale mujh ko ai ajal kashmakash-e-gham se chhuDaa le mujh ko kuchh to le kaam taghaaful se vafaa ke paikar ye tiraa pyaar kahin maar na Daale mujh ko vaah ri qismat ki kahaan manzil-e-maqsud mili jab maza dene lage paanv ke chhaale mujh ko aakhiri vaqt talak saath andheron ne diyaa raas aate nahin duniyaa ke ujaale mujh ko koi bhi mohsin o rahbar hi nahin hai meraa yuun to 'daanish' hain bahut chaahne vaale mujh ko"

"zarre zarre mein mahak pyaar ki Daali jaae bu taassub ki har ik dil se nikaali jaae apne dushman ko bhi khud baDh ke lagaa lo siine baat bigDi hui is tarah banaa li jaae aap khush ho ke agar ham ko ijaazat de dein aap ke naam se ik bazm sajaa li jaae ho ke majbur ye bachchon ko sabaq denaa hai ab qalam chhoD ke talvaar uThaa li jaae soch kar arz-e-talab vaqt ke sultaan se kar maangne vaale tiri baat na khaali jaae"

"qarib tum ho to har ik se dosti si lage jo tum ho duur to zaat apni ajnabi si lage khudaa hi jaane hayaat apni kis tarah guzre baghair un ke to ik pal bhi ik sadi si lage tum apnaa kah ke pukaaro kabhi to bhule se ye zindagi kabhi ham ko bhi zindagi si lage navaazishaat kaa taalib nahin huun main lekin ab is tarah bhi na mil jis se be-rukhi si lage na puchh kaifiyat-e-intizaar ai hamdam ki tez dhuup bhi is vaqt chaandni si lage khushi to apne muqaddar mein hi nahin 'daanish' kisi ke gham ki ye daulat bhi 'aarzi si lage"

"khushk aankhon mein bahut hain abhi aansu baaqi phuul sukhe hain magar in mein hai khushbu baaqi un ki zulfon ko chhue ek zamaana guzraa aaj tak hai mire haathon mein vo khushbu baaqi sabr-o-taskin se jo mansub the vo khatm hue daaman-e-dil mein hain ab jabr ke aansu baaqi kyaa tiri yaad ki ab ham se tavaazo' hogi ab na baaqi hai lahu dil mein na aansu baaqi roz-e-takhliq jo aavaaz suni thi 'daanish' us kaa ab tak miri rag-rag mein hai jaadu baaqi"

"'ajib qaid lagaai hai tum ne pyaar ke saath khizaan-nasib rahun rah ke main bahaar ke saath gham-e-hayaat se mumkin nahin hai chhuTkaaraa tiraa khayaal bhi hai fikr-e-rozgaar ke saath qarib honTon ke labrez jaam chhalkaanaa 'ajab mazaaq hai saaqi ye baada-khvaar ke saath miraa khayaal hai tum bhi na toD paaoge ik aisaa rishta-e-mohkam hai intizaar ke saath ye aur baat uThaate hain ungliyaan dushman mujhe khushi hai luTaa huun main rah ke yaar ke saath luTaa ke apnaa sabhi kuchh bahut huun khush 'daanish' khayaal un ki khushi kaa thaa apni haar ke saath"

"dil se tire khayaal ko kaise bhulaaein ham ye aisi chiiz kab hai jise bhuul jaaein ham yuun bhi guzar hi jaaeinge lamhe hayaat ke tum muskuraao anjuman-e-gham sajaaein ham o dene vaale ham ko khushi de ki ranj de lekin rahe khayaal ki ghabraa na jaaein ham itni khushi na bakhsh ki aansu nikal paDein gham bhi na is qadar hon ki hansne na paaein ham ruThi hui hai maut bhi duniyaa ke saath saath ab aisi zindagi ko kahaan le ke jaaein ham lillaah yuun nigaah-e-karam se na dekhiye gham chhin gayaa to Dar hai kahin mar na jaaein ham marnaa vaqaar-e-‘ishq pe ‘ain-e-hayaat hai 'daanish' ajal se kis liye daaman bachaaein ham"

"zaalim se mohabbat kaa sila maang rahe hain naadaan hain patthar se vafaa maang rahe hain phir aur koi saazish-e-rangin to nahin hai vo aaj mire haq mein du'aa maang rahe hain altaaf-o-karam aap ke auron ko mubaarak ham aap se jiine ki adaa maang rahe hain ham murtakib-e-jurm-e-vafaa ho to chuke hain do jurm-e-mohabbat ki sazaa maang rahe hain jab mujh se koi un kaa ta'alluq nahin 'daanish' phir kyon mire jiine ki du'aa maang rahe hain"

"ik sitaaron bharaa aasmaan ho gae ab khudaa ki qasam tum javaan ho gae muskuraae to tiron ki barsaat ki aur naaraaz ho kar kamaan ho gae yuun bazaahir to nazron se nazrein milin kaise kaise magar imtihaan ho gae tum bhi ik vaaqi'a ho ke rah jaaoge ham bhi bhuli hui daastaan ho gae aazmaanaa hai kyaa koi tir-e-sitam aaj 'daanish' vo kyon mehrbaan ho gae"

"tum ne jab zulf-e-pareshaan ko sanvaaraa hogaa sadqa-e-husn ghaTaaon ne utaaraa hogaa aap ki chashm-e-karam kaa jo ishaara hogaa auj par mere muqaddar kaa sitaara hogaa sang-dil tere bhi aansu nikal aae honge Dubne vaale ne jab tujh ko pukaaraa hogaa main ne ilzaam khushi se liye sab apne sar aap badnaam huun ye kis ko gavaara hogaa kuchh to qismat ki hai saazish miri barbaadi mein aur kuchh un ki bhi nazron kaa ishaara hogaa kyaa gharaz us ko zamaane ki khushi se 'daanish' yaar kaa gham hi jise jaan se pyaaraa hogaa"