Ghazal

"ye baat ye tabassum ye naaz ye nigaahein aakhir tumhin bataao kyunkar na tum ko chaahein ab sar uThaa ke main ne shikvon se haat uThaayaa mar jaaungaa sitamgar nichi na kar nigaahein kuchh gul hi se nahin hai ruh-e-numu ko raghbat gardan mein khaar ki bhi Daale hue hai baanhein allaah ri dil-farebi jalvon ke baankpan ki mahfil mein vo jo aae kaj ho gaiin kulaahein ye bazm 'josh' kis ke jalvon ki rahguzar hai har zarre mein hain ghaltaan uThti hui nigaahein"

"gudaaz-e-dil se baatin kaa tajalli-zaar ho jaanaa mohabbat asl mein hai ruuh kaa bedaar ho jaanaa naved-e-aish se ai dil zaraa hushyaar ho jaanaa kisi taaza musibat ke liye tayyaar ho jaanaa vo un ke dil mein shauq-e-khud-numaai kaa khayaal aanaa vo har shai kaa tabassum ke liye tayyaar ho jaanaa mizaaj-e-husn ko ab bhi na samjho to qayaamat hai hamaaraa aur vafaa ke naam se be-zaar ho jaanaa sahar kaa is tarah angDaai lenaa dil-farebi se udhar shaair ke mahsusaat kaa bedaar ho jaanaa tavassul se tire dil mein bharungaa quvvatein barqi zaraa meri taraf bhi ai nigaah-e-yaar ho jaanaa vo aaraaish mein sab quvvat kisi kaa sarf kar denaa tahammul mein vo har koshish miri bekaar ho jaanaa maaaz-allaah ab ye rang hai duniyaa ki mahfil kaa khudaa kaa naam lenaa aur zalil o khvaar ho jaanaa ragon se khuun saaraa zahr ban kar phuuT niklegaa zaraa ai 'josh' zabt-e-shauq se hushyaar ho jaanaa"

"dil-e-aazaada-rau mein vo tamannaa thi bayaabaan ki qadam rakhte hi shaq hone lagi divaar zindaan ki khudaa ki rahmatein ai mutrib-e-rangin-navaa tujh par ki har kaanTe mein tu ne ruuh dauDaa di gulistaan ki ye saabit kar diyaa tujh ko banaa kar dast-e-qudrat ne ki ho sakti hain itni khubiyaan surat mein insaan ki nasim-e-subh ThanDi saans bharti hai mazaaron par udaasi munh-andhere dekhiye gor-e-gharibaan ki ye aalam kyaa hai ik majmua hai naachiz zarron kaa ye duniyaa kyaa hai ik tarkib ajzaa-e-pareshaan ki havaaon ke vo jhonke vo khule maidaan ki sardi vo lahrein chaand se rukhsaar par zulf-e-pareshaan ki hamaari zindagi kyaa silsila ik dil dhaDakne kaa hamaari maut kyaa jumbish hai ik jazbaat-e-pinhaan ki banaa deingi yaqin hai 'josh' mard-e-baa-khudaa ik din tapish-andoziyaan siine mein barq-e-soz-e-pinhaan ki"

"tajrabe ke dasht se dil ko guzarne ke liye roz ik surat nai hai ghaur karne ke liye jab koi bantaa hai laakhon hastiyon ko meT kar subh taaron ko dabaati hai ubharne ke liye haamil-e-asraar-e-fitrat huun gadaa bhi huun to kyaa baat ye kaafi hai mujh ko fakhr karne ke liye ruuh ko chamkaa khudi ko toD kar ziine banaa do ye tadbirein hain duniyaa mein ubharne ke liye ghaur se dekhaa nizaam-e-dahr to saabit huaa aadmi paidaa huaa hai kaam karne ke liye subh uTh kar aansuon se khuun ke rotaa huun main dil ke naqshe mein vafaa kaa rang bharne ke liye gauhar-e-maqsud khud miltaa hai himmat shart hai muztarib rahtaa hai har moti ubharne ke liye aankh sharmaai hui hai baal peshaani pe hain aaina-khaane mein jaate hain sanvarne ke liye kah do duniyaa ke havaadis se na chheDein is tarah 'josh' ham tayyaar hi baiThe hain marne ke liye"

"is qadar Duubaa huaa dil dard ki lazzat mein hai teraa 'aashiq anjuman hi kyuun na ho khalvat mein hai jazb kar lenaa tajalli ruuh ki 'aadat mein hai husn ko mahfuz rakhnaa 'ishq ki fitrat mein hai mahv ho jaataa huun aksar main ki dushman huun tiraa dilkashi kis darja ai duniyaa tiri surat mein hai uf nikal jaati hai khatre hi kaa mauqa kyuun na ho husn se betaab ho jaanaa miri fitrat mein hai us kaa ik adnaa karishma ruuh vo itnaa 'ajib 'aql istiajaab mein hai falsafa hairat mein hai nuur kaa taDkaa hai dhimi ho chali hai chaandni hil rahaa hai dil miraa masruf vo zinat mein hai"

"meri haalat dekhiye aur un ki surat dekhiye phir nigaah-e-ghaur se qaanun-e-qudrat dekhiye sair-e-mahtaab-o-kavaakib se tabassum taa-bake ro rahi hai vo kisi ki sham-e-turbat dekhiye aap ik jalva saraasar main saraapaa ik nazar apni haajat dekhiye meri zarurat dekhiye apne saamaan-e-taayyush se agar fursat mile bekason kaa bhi kabhi tarz-e-maishat dekhiye muskuraa kar is tarah aayaa na kiije saamne kis qadar kamzor huun main meri surat dekhiye aap ko laayaa huun viraanon mein ibrat ke liye hazrat-e-dil dekhiye apni haqiqat dekhiye sirf itne ke liye aankhein hamein bakhshi gaiin dekhiye duniyaa ke manzar aur ba-ibrat dekhiye maut bhi aai to chehre par tabassum hi rahaa zabt par hai kis qadar ham ko bhi qudrat dekhiye ye bhi koi baat hai har vaqt daulat kaa khayaal aadmi hain aap agar to aadmiyat dekhiye phuuT niklegaa jabin se ek chashma husn kaa subh uTh kar khanda-e-saamaan-e-qudrat dekhiye rashha-e-shabnam bahaar-e-gul farogh-e-mehr-o-maah vaah kyaa ashaar hain divaan-e-fitrat dekhiye is se baDh kar aur ibrat kaa sabaq mumkin nahin jo nashaat-e-zindagi the un ki turbat dekhiye thi khataa un ki magar jab aa gae vo saamne jhuk gaiin meri hi aankhein rasm-e-ulfat dekhiye khush-numaa yaa bad-numaa ho dahr ki har chiiz mein 'josh' ki takhil kahti hai ki nudrat dekhiye"

"vo sabr de ki na de jis ne be-qaraar kiyaa bas ab tumhin pe chalo ham ne inhisaar kiyaa tumhaaraa zikr nahin hai tumhaaraa naam nahin kiyaa nasib kaa shikva hazaar baar kiyaa subut hai ye mohabbat ki saada-lauhi kaa jab us ne vaada kiyaa ham ne e'tibaar kiyaa maaal ham ne jo dekhaa sukun o jumbish kaa to kuchh samajh ke taDapnaa hi ikhtiyaar kiyaa mire khudaa ne mire sab gunaah bakhsh diye kisi kaa raat ko yuun main ne intizaar kiyaa"

"sarshaar huun sarshaar hai duniyaa mire aage kaunain hai ik larzish-e-sahbaa mire aage har najm hai ik aariz-e-raushan mire nazdik har zarra hai ik dida-e-binaa mire aage har jaam hai nazzaara-e-kausar mire haq mein har gaam hai gulgasht-e-musallaa mire aage har phuul hai laal-e-shakar-afshaan ki hikaayat har ghuncha hai ik harf-e-tamannaa mire aage ik mazhaka hai pursish-e-uqbaa mire nazdik ik vahm hai andesha-e-fardaa mire aage hon kitni hi taarik shab-e-zist ki raahein ik nuur saa rahtaa hai jhalaktaa mire aage main aur Darun saulat-e-duniyaa-e-dani se khud larza-bar-andaam hai duniyaa mire aage jhuktaa hai ba-sad ijz kalisaa mire dar par aataa hai laraztaa huaa kaaba mire aage paimaane se jis vaqt chhalak jaati hai sahbaa lahraataa hai ik husn kaa dariyaa mire aage jab chaand jhamaktaa hai mire saaghar-e-zar mein chaltaa nahin khurshid kaa daavaa mire aage jab jhuum ke miinaa ko uThaataa huun ghaTaa mein hiltaa hai sar-e-gumbad-e-minaa mire aage aati hai dulhan ban ke mashiyyat ki jilau mein aavaargri-e-aadam-o-havvaa mire aage paimaane pe jis vaqt jhukaataa huun suraahi jhuktaa hai sar-e-aalam-e-baalaa mire aage pahlu mein hai ik zohra-jabin haath mein saaghar is vaqt na duniyaa hai na uqbaa mire aage 'josh' uThti hai dushman ki nazar jab miri jaanib khultaa hai mohabbat kaa darichaa mire aage"

"numaayaan muntahaa-e-sai-e-paiham hoti jaati hai tabiat be-niyaaz-e-har-do-aalam hoti jaati hai uThi jaati hai dil se haibat-e-aalaam-e-ruhaani jaraahat bahr-e-qalb-e-zaar marham hoti jaati hai kinaaraa kar rahaa hai ruuh se haijaan-e-sartaabi ki gardan justuju ke shauq mein kham hoti jaati hai junun kaa chhaa rahaa hai zindagi par ik dhundalkaa saa khirad ki raushni siine mein maddham hoti jaati hai nasim-e-be-niyaazi aa rahi hai baam-e-gardun se urus-e-muddaaa ki zulf barham hoti jaati hai numaayaan ho chalaa hai ik jahaan chashm-e-tasavvur par nazar shaayad harif-e-saaghar-e-jam hoti jaati hai girah yuun khul rahi hai har nafas zauq-e-tamaashaa ki ki har adnaa si shai ab ek aalam hoti jaati hai fazaa mein kaanpti hain dhundli dhundli nuqrai shaklein har ik takhil-e-paakiza mujassam hoti jaati hai na jaane sina-e-ehsaas par ye haat hai kis kaa tabiat be-niyaaz-e-shaadi-o-gham hoti jaati hai samajh mein aaein kyaa baarikiyaan qaanun-e-qudrat ki ibaadat kasrat-e-maani se mubham hoti jaati hai khajil thaa jis ki shorish se talaatum bahr-e-hasti kaa mire dil mein vo halchal 'josh' ab kam hoti jaati hai"

"uThi vo ghaTaa rang-saamaaniyaan kar guhar-paashiyaan kar zar-afshaaniyaan kar suraahi jhukaa aur dhumein machaa de gulaabi uThaa aur gul-afshaaniyaan kar miTaa daagh-e-hosh aur madhosh ban jaa uThaa jaam-e-zar aur sultaaniyaan kar nigaahon se barsaa de abr-e-javaani mai-e-laala-gun se gulistaaniyaan kar samundar pe chal aur ilyaas ban jaa havaaon pe uD aur sulemaaniyaan kar sukun paanv chume vo halchal machaa de khirad sar jhukaa de vo naadaaniyaan kar alam khol kar 'josh' bad-mastiyon ke jahaan-daariyaan kar jahaan-baaniyaan kar"

"koi daaraa-e-jaan hai kyaa maalum yaa faqat daastaan hai kyaa maalum kyaa hudud-e-yaqin mein hai khallaaq yaa saraasar gumaan hai kyaa maalum aarzu thi khudaa ko yaa haajat kyuun vajud-e-jahaan hai kyaa maalum lahv yaa khud mein naqs kaa ehsaas illat-e-ins-o-jaan hai kyaa maalum iztiraaran ki baad-e-fikr-e-daqiq khilat-e-in-o-aan hai kyaa maalum kis liye kis taraf bahar saaat rakhsh-e-hasti davaan hai kyaa maalum kis khalaa-e-nazar ke bharne ko ye zamin aasmaan hai kyaa maalum hai kahin aaftaab-e-zaat-o-sifaat yaa shuaa-e-bayaan hai kyaa maalum kuchh nahin hai ba-juz fareb yahaan aur sab kuchh vahaan hai kyaa maalum kis liye aql ke safine mein naql kaa baadbaan hai kyaa maalum chaaplusi mein kis liye mashghul khail-e-karrubiyaan hai kyaa maalum malgajaahaT si hai sar-e-gardun abr hai yaa dhuaan hai kyaa maalum vo tavaanaai hai ki shakhsiyyat kaun shaah-e-zamaan hai kyaa maalum ban ke pichhe hai ik khafi halchal gard-e-paa kaarvaan hai kyaa maalum shar hai kyuun is qadar lahim-o-shahim khair kyuun nim-jaan hai kyaa maalum shaitanat kyuun hai rashk-e-maah-e-munir kyuun risaalat kataan hai kyaa maalum kaun said-e-gunaah hai amdan kyuun jahannum tapaan hai kyaa maalum kyaa havaadis ba-taur-e-mashghala hain yaa sar-e-imtihaan hai kyaa maalum aur kyuun imtihaan ke chakkar mein aalim-o-ghaib-daan hai kyaa maalum kaun in faaqa-kash gharibon kaa zaamin-e-aab-o-naan hai kyaa maalum aankhein labrez hain subu khaali kaun pir-e-mughaan hai kyaa maalum sikka-e-maut shahr-e-hasti mein kis khataa par ravaan hai kyaa maalum nafs-e-ammaara bakhshne vaalaa ham se kyuun sar-garaan hai kyaa maalum kyuun hamaari zamin par har aan karbalaa kaa samaan hai kyaa maalum is buri tarah munh se kyuun baahar aadmi ki zabaan hai kyaa maalum 'josh' nur-e-khudaa pe kyuun haavi rang-e-ru-e-butaan hai kyaa maalum"

"ye nasib-e-shaairi hai zahe shaan-e-kibriyaai ki mile na zindagi bhar mujhe daad-e-khush-navaai ba-khudaa azim-tar hai shohdaa ke khuun se bhi mire sina-e-qalam mein jo bhari hai raushnaai ye ajiib maajraa hai ki khadyau-e-haft-qulzum taraf-e-saraab dauDe pai-e-qismat-aazmaai falak aur use jhukaae sar-e-manzil-e-safihaan malak aaein jis ke dar par ba-havaa-e-jabha-saai chaman-e-shuur-e-nau ko jo lahu se apne sinche kabhi us ko sukh na bakhshe koi panja-e-hinaai hama saaz huun ba-zaahir hama soz huun ba-baatin miri zindagi bukaai miri shaairi ghinaai mire taar o paud larzaan ba-havaa-e-naa-muraadi mire khadd-o-khaal darakhshaan ba-tabassum-e-riyaai miraa dil hai girya maskan mire lab taraana manzil miri nai shikast-e-khaatir miri lai hai momyaai miraa jaam-e-shab sulemaan hama taaj-e-khusravaana miri chashm-e-roz paimaa hama kaasa-e-gadaai miri baargaah-e-hasti hama ijz bandagaana miri baargaah-e-masti hama satvat-e-khudaai dar-e-khalq par jhukaa hai na jhukegaa taa qayaamat sar-e-'josh' mein bharaa hai vo ghurur-e-kibriyaai"

"yuun Dhal gayaa hai dard mein darmaan kabhi kabhi naghme bane hain girya-e-pinhaan kabhi kabhi haunki hain baad-e-subh ki rau mein bhi aandhiyaan ublaa hai saahilon se bhi tufaan kabhi kabhi baDhtaa chalaa gayaa huun unhi ki taraf kuchh aur yuun bhi huaa huun un se gurezaan kabhi kabhi aanchon mein gungunaate hain gulzaar gaah gaah shoalon se paT gayaa hai gulistaan kabhi kabhi lai se nikal paDi hai kabhi hichkiyon ki fauj aahein bani hain raag kaa unvaan kabhi kabhi daamaan-e-gul-rukhaan ki uDaa di hain dhajjiyaan phaaDaa hai ham ne yuun bhi garebaan kabhi kabhi kaliyaan jhulas gai hain dahakne lage hain phuul yuun bhi chali hai baad-e-bahaaraan kabhi kabhi us vaqt bhi ki khaatir-e-majmua thi nasib kam-bakht dil huaa hai pareshaan kabhi kabhi"

"ai ba-rukh mushaf-e-gulzaar-o-charaagh-e-haram-e-ghunchagi-o-aaya-e-gul-baari-o-quraan-e-bahaar ai ba-qad mauj-e-ravaan barq-e-tapaan sarv-e-sahi shaakh-e-gul-e-taaza-o-ilhaam-e-khiraamaan-e-bahaar pae gul-gasht zaraa us qad-e-balaa-e-falak-taab-o-chaman-saaz ko de izn-e-khiraam ki tire hijr mein be-kaif hai be-ruh hai be-taab hai be-khvaab hai lailaa-e-khayabaan-e-bahaar bazm ki bazm hai pazhmurda-o-afsurda-o-dil-basta-o-khaamosh-o-malul-o-ghamnaak khol de kaakul-e-zholida-o-shab-rang-o-jahaan-said-o-guhar-bez ki hai chashma-e-haivaan-e-bahaar aa bhi jumbish mein ki hain gosh-bar-aavaaz adibaan-o-harifaan-o-gul-o-laala-o-sarv ai lab-e-laal-e-fusun-baar-o-dil-aavez shakar-rez ki hai tujh pe fidaa larzish-e-daamaan-e-bahaar barbat-o-ud-o-sharaab-o-daf-o-afsaana-o-afsun-o-shab-e-maah-o-rabaab-o-saaghar aa ki mushtaaq hain ai jaan-e-chaman zohra-jabin hosh-rubaa maah-laqaa sham-e-shabistaan-e-bahaar dahr hai khufta-o-aashufta-o-aazurda-o-gham-dida-o-naashaad-o-zabun-haal-o-tabaah haan uThaa nargis-e-makhmur-o-guhar-taab-o-junun-khez ki hai mahbas-e-mai-khaana-o-zindaan-e-bahaar aaj hai 'haafiz-e-'shiraazi'-o-'khayyaam'-o-'naziri'-o-'fughaani'-o-'zuhuri' kaa javaab ye tiraa 'josh' ki hai mast-o-kharaabaati-o-sar-halqa-e-rindaan-e-jahaan qibla-e-khaasaan-e-bahaar"

"mujh se saaqi ne kahi raat ko kyaa baat ai 'josh' yaani azdaad hain parvarda-e-yak-zaat ai 'josh' mast o begaana guzar jaa kura-e-khaaki se ye to hai rahguzar-e-sail-e-khayaalaat ai 'josh' aur to aur khud insaan bahaa jaataa hai kitnaa pur-haul hai tufaan-e-rivaayaat ai 'josh' log kahte hain hijaabaat nahin juz aayaat kis se kahiye ki ye aayaat hain khud zaat ai 'josh' ahl-e-alfaaz shariat pe miTe jaate hain kis ko samjhaaun mashiyyat ke ishaaraat ai 'josh' dekhiye subh-e-junun zehn mein kab taale ho aql suntaa huun ki hai ik abadi raat ai 'josh' quvvat-e-kal ke masaaleh se aur itne bad-zan vaae bar-daghdagha-e-ahl-e-munaajaat ai 'josh' saaghar-e-mai hi mein hotaa hai tulu aur ghurub aafrin bar-dil-e-rindaan-e-kharaabaat ai 'josh' kaun maanegaa ki hain ain-e-mashiyyat vallaah zindagaani ke ye bigDe hue aadaat ai 'josh' tujh ko kyaa faqr mein raahat hai ki shaahi mein faraagh tu to hai khalvati-e-pir-e-kharaabaat ai 'josh'"

"phir aashnaa-e-lazzat-e-dard-e-jigar hain ham phir mahram-e-kashaakash-e-har-khair-o-shar hain ham har saans de rahi hai khabar kaaenaat ki phir baada-e-jamaal se yuun be-khabar hain ham phir ishq ki nazar mein hai maashuqiyat kaa naaz phir husn-e-dil-navaaz se shir-o-shakar hain ham jiine ke ishtiyaaq se hai phir ramidgi phir sina-e-hayaat mein azm-e-safar hain ham hoshyaar-baash zulmat-e-gham-khaana-e-hayaat phir markaz-e-tajalli-e-shams-o-qamar hain ham kis zom mein hai ai shab-e-daijur-e-zindagi phir raazdaar-e-nur-e-tulu-e-sahar hain ham hai kis khayaal-e-khaam mein ai khaarzaar-e-dahr phir kaamraan-e-khanda-e-gul-haa-e-tar hain ham phir zindagi hai gham ki amaanat liye hue har daulat-e-nashaat se phir bahra-var hain ham phir faiz-e-aashiqi se ba-in be-bazaaati jeb-e-jahaan mein daulat-e-laal-o-guhar hain ham phir baavajud-e-faqr vo haasil hai tumtaraaq tu ye kahe ki saahib-e-taaj-o-kamar hain ham aankhon mein nur-e-mushaf-e-jaanaan liye hue phir kardgaar-e-ishq ke paighaam-bar hain ham khulte nahin hain 'josh' dimaaghon pe dil ke raaz baalaa-tar az rasaai-e-naqd-o-nazar hain ham"

"aa fasl-e-gul hai gharq-e-tamannaa tire liye Duubaa huaa hai rang mein sahraa tire liye saahil pe sarv-e-naaz ko de zahmat-e-khiraam bal khaa rahaa hai khaak pe dariyaa tire liye ifaa-e-ahd kar ki hai muddat se be-qaraar ruh-e-vafaa-e-vaada-e-fardaa tire liye shaanon pe ab to kaakul-e-shab-rang khol de bikhri hui hai zulf-e-tamannaa tire liye uTh chashm-e-jaavedaana-e-saaghar-farosh uTh machli hui hai larzish-e-sahbaa tire liye ai aaftaab-e-jalva-e-jaanaan buland ho khoyaa huaa hai matla-e-duniyaa tire liye mauj-e-shamim-e-sumbul-o-raihaan ke darmiyaan vaa hai musaahibat kaa darichaa tire liye aa aur daad de ki baiin chahsm-e-haq-nigar khaae hue huun ziist kaa dhokaa tire liye sabze kaa farsh abr kaa khema gulon kaa itr gulshan mein ehtimaam hai kyaa kyaa tire liye tughyaan-e-gul shabaab pe bulbul kharosh mein ik hashr saa hai baagh mein barpaa tire liye 'josh' aur nang-e-khidmat-e-sultaan o paas-e-hosh ye bhi kiye hue hai gavaaraa tire liye"

"aao kaabe se uThein su-e-sanam-khaana chalein taaba-e-faqr kahe savlat-e-shaahaana chalein kaanp uThe baargah-e-sar-e-afaaf-e-malakut yuun maaasi kaa lunDhaate hue paimaana chalein aao ai zamzama-sanjaan-e-saraa parda-e-gul ba-havaa-e-nafas-e-taaza-e-jaanaana chalein girya-e-nim-shab o aah-e-sahar-gaahi ko chang o barbat pe nachaate hue turkaana chalein taa na mahsus ho vaamaandagi-e-raah-e-daraaz zulf-e-khubaan kaa sunaate hue afsaana chalein pheink kar subha o sajjaada o dastaar o kulaah ba rabaab o daf o tambura o paimaana chalein naghma o saaghar o taaus o ghazal ke hamraah su-e-khum-khaana pai-e-sajda-e-rindaana chalein khushk zarron pe machal jaae shamim o tasnim sabt karte hue yuun laghzish-e-mastaana chalein daaman-e-'josh' mein phir bhar ke mataa-e-kaunain khidmat-e-pir-e-mughaan mein pai-e-nazraana chalein"

"zaalim ye khamoshi bejaa hai iqraar nahin inkaar to ho ik aah to nikle toD ke dil naghme na sahi jhankaar to ho har saans mein sadhaa naghme hain har zarre mein laakhon jalve hain jaan mahv-e-rumuz-e-saaz to ho dil jalva-gah-e-anvaar to ho shaakhon ki lachak har fasl mein hai saaqi ki jhalak har rang mein hai saaghar ki khanak har zarf mein hai makhmur to ho sarshaar to ho kyunkar na shab-e-mah raushan ho kyuun subh na daaman chaak kare kuchh vasf-e-rumuz-e-husn to ho kuchh sharh-e-jamaal-e-yaar to ho siine mein khataaein muztar hain inaam kaa vo iqraar karein mansur hazaaron ab bhi hain ai 'josh' sile mein daar to ho"

"hairat hai aah-e-subh ko saari fazaa sune lekin zamin pe but na falak par khudaa sune fariyaad-e-andalib se kaanpe tamaam baagh lekin na gul na ghuncha na baad-e-sabaa sune khud apni hi sadaaon se gunje hue hain kaan koi kisi ki baat sune bhi to kyaa sune ye bhi ajab tilism hai ai shorish-e-hayaat dard-aashnaa ki baat na dard-aashnaa sune shaahon ke dil to sang hain shaahon kaa zikr kyaa ye bhi nahin ki haal gadaa kaa gadaa sune aalam hai ye ki gosh-e-bashar tak hai be-niyaaz honaa thaa ye ki banda kahe aur khudaa sune sunte bhi hain jo log to yuun daastaan-e-gham jaise yazid saaneha-e-karbalaa sune haan ai khuda-e-arsh-e-barin o butaan-e-farsh tum mein se ho koi to miraa maajraa sune pashmina-posh raah-nashinon ki iltijaa shaayad kabhi vo shaahid-e-atlash-qabaa sune ham naadir o yazid na hajjaaj hain na shimr allaah aur 'josh' hamaari duaa sune"

"phir sar kisi ke dar pe jhukaae hue hain ham parde phir aasmaan ke uThaae hue hain ham chhaai hui hai ishq ki phir dil pe be-khudi phir zindagi ko hosh mein laae hue hain ham jis kaa har ek juzv hai iksir-e-zindagi phir khaak mein vo jins milaae hue hain ham haan kaun puchhtaa hai khushi kaa nahufta raaz phir gham kaa baar dil pe uThaae hue hain ham haan kaun dars-e-ishq-e-junun kaa hai khvaast-gaar aae ki har sabaq ko bhulaae hue hain ham aae jise ho jaada-e-rifat ki aarzu phir sar kisi ke dar pe jhukaae hue hain ham baiat ko aae jis ko ho tahqiq kaa khayaal kaun-o-makaan ke raaz ko paae hue hain ham hasti ke daam-e-sakht se uktaa gayaa hai kaun kah do ki phir giraft mein aae hue hain ham haan kis ke paa-e-dil mein hai zanjir-e-aab-o-gil kah do ki daam-e-zulf mein aae hue hain ham haan kis ko justuju hai nasim-e-faraagh ki aasudgi ko aag lagaae hue hain ham haan kis ko sair-e-arz-o-samaa kaa hai ishtiyaaq dhuni phir us gali mein ramaae hue hain ham jis par nisaar kaun-o-makaan ki haqiqatein phir 'josh' us fareb mein aae hue hain ham"

"tabassum hai vo honTon par jo dil kaa kaam kar jaae unhein is ki nahin parvaa koi martaa hai mar jaae duaa hai meri ai dil tujh se duniyaa kuuch kar jaae aur aisi kuchh bane tujh par ki armaanon se Dar jaae jo mauqaa mil gayaa to khizr se ye baat puchheinge jise ho justuju apni vo bechaara kidhar jaae sahar ko sina-e-aalam mein partav Daalne vaale tasadduq apne jalve kaa miraa baatin sanvar jaae pareshaan baal karte hain unhein shokhi se matlab hai bikhartaa hai agar shiraaza-e-aalam bikhar jaae hayaat-e-daaimi ki lahar hai is zindagaani mein agar marne se pahle ban paDe to 'josh' mar jaae"

"jab se marne ki ji mein Thaani hai kis qadar ham ko shaadmaani hai shaairi kyuun na raas aae mujhe ye miraa fann-e-khaandaani hai kyuun lab-e-iltijaa ko duun jumbish tum na maanoge aur na maani hai aap ham ko sikhaaein rasm-e-vafaa mehrbaani hai mehrbaani hai dil milaa hai jinhein hamaaraa saa talkh un sab ki zindagaani hai koi sadma zarur pahunchegaa aaj kuchh dil ko shaadmaani hai"

"qadam insaan kaa raah-e-dahr mein tharraa hi jaataa hai chale kitnaa hi koi bach ke Thokar khaa hi jaataa hai nazar ho khvaah kitni hi haqaaiq-aashnaa phir bhi hujum-e-kashmakash mein aadmi ghabraa hi jaataa hai khilaaf-e-maslahat main bhi samajhtaa huun magar naaseh vo aate hain to chehre par taghayyur aa hi jaataa hai havaaein zor kitnaa hi lagaaein aandhiyaan ban kar magar jo ghir ke aataa hai vo baadal chhaa hi jaataa hai shikaayat kyuun ise kahte ho ye fitrat hai insaan ki musibat mein khayaal-e-aish-e-rafta aa hi jaataa hai shagufon par bhi aati hain balaaein yuun to kahne ko magar jo phuul ban jaataa hai vo kumhlaa hi jaataa hai samajhti hain maaal-e-gul magar kyaa zor-e-fitrat hai sahar hote hi kaliyon ko tabassum aa hi jaataa hai"