Love Shayari

sau sau umīdeñ bañdhtī hai ik ik nigāh par
mujh ko na aise pyaar se dekhā kare koī

hamārī baat mohabbat siiñ tum jo gosh karo
to apnī prem kahānī tumheñ sunā.ūñgā

ishq ne 'ġhālib' nikammā kar diyā
varna ham bhī aadmī the kaam ke

vo āshiqī ke khet meñ sābit qadam huā
jo koī zaḳhm-e-ishq liyā dil kī Dhaal par

tirī abrū hai mehrāb-e-mohabbat
namāz-e-ishq mere par huī farz

hamārā ishq ravāñ hai rukāvaToñ meñ 'zafar'
ye ḳhvāb hai kisī dīvār se nahīñ ruktā

maktab-e-ishq kā moallim huuñ
kyuuñ na ho.e dars-e-yār kī takrār

dil meñ na ho jur.at to mohabbat nahīñ miltī
ḳhairāt meñ itnī baḌī daulat nahīñ miltī

hamārā 'mīr'-jī se muttafiq honā hai nā-mumkin
uThānā hai jo patthar ishq kā to halkā bhārī kyā

shahr-vāloñ kī mohabbat kā maiñ qaa.el huuñ magar
maiñ ne jis haath ko chūmā vahī ḳhanjar niklā

ishq se tabī.at ne ziist kā mazā paayā
dard kī davā paa.ī dard-e-be-davā paayā

ishq kā duur kare dil se jo dhaḌkā ta.avīz
is dhaḌāke kā koī ham ne na dekhā ta.avīz

rahegā saath tirā pyaar zindagī ban kar
ye aur baat mirī zindagī vafā na kare

subūt-e-ishq kī ye bhī to ek sūrat hai
ki jis se pyaar kareñ us pe tohmateñ bhī dhareñ

vo jis ghamanD se bichhḌā gila to is kā hai
ki saarī baat mohabbat meñ rakh-rakhāv kī thī

sitāroñ se aage jahāñ aur bhī haiñ
abhī ishq ke imtihāñ aur bhī haiñ

kis tarah apnī mohabbat kī maiñ takmīl karūñ
ġham-e-hastī bhī to shāmil hai ġham-e-yār ke saath

kufr-o-īmāñ do nadī haiñ ishq kiiñ
āḳhirash dono kā sañgam hovegā

us bevafā ne ham ko agar apne ishq meñ
rusvā kiyā ḳharāb kiyā phir kisī ko kyā

maanā jīvan meñ aurat ik baar mohabbat kartī hai
lekin mujh ko ye to batā de kyā tū aurat zaat nahīñ

tū mohabbat se koī chaal to chal
haar jaane kā hausla hai mujhe

us ke yuuñ tark-e-mohabbat kā sabab hogā koī
jī nahīñ ye māntā vo bevafā pahle se thā

ġhair taraf kyūñki nazar kar sakūñ
ḳhauf hai tujh ishq ke jāsūs kā

hosh vāloñ ko ḳhabar kyā be-ḳhudī kyā chiiz hai
ishq kiije phir samajhiye zindagī kyā chiiz hai