Watan Shayari

vatan kī fikr kar nādāñ musībat aane vaalī hai
tirī barbādiyoñ ke mashvare haiñ āsmānoñ meñ

turkoñ kā jis ne dāman hīroñ se bhar diyā thā
merā vatan vahī hai merā vatan vahī hai

maz.hab nahīñ sikhātā aapas meñ bair rakhnā
hindī haiñ ham vatan hai hindostāñ hamārā

mīr-e-arab ko aa.ī ThanDī havā jahāñ se
merā vatan vahī hai merā vatan vahī hai

ham ahl-e-qafas tanhā bhī nahīñ har roz nasīm-e-sub.h-e-vatan
yādoñ se mo.attar aatī hai ashkoñ se munavvar jaatī hai

jannat kī zindagī hai jis kī fazā meñ jiinā
merā vatan vahī hai merā vatan vahī hai

ik ḳhūñ-chakāñ kafan meñ karoḌoñ banāo haiñ
paḌtī hai aañkh tere shahīdoñ pe huur kī

ḳhudā bhī kaisā huā ḳhush mire qarīne par
mujhe shahīd kā darja milā hai jiine par

dayār-e-ġhair meñ luTte to koī baat na thī
luTe vatan meñ to sadma huā na jaane kyuuñ

vatan-parastī hamārā maz.hab haiñ jism-o-jāñ mulk kī amānat
kareñge barpā qahr adū par rahegā daa.im vatan salāmat

jo safāyā qaum kā kar de vahī leader hai aaj
ho safā.ī haath meñ jis ke vo hai ahl-e-hunar

yuuñ ruuh thī adam meñ mirī bahr-e-tan udaas
ġhurbat meñ jis tarah ho ġharīb-ul-vatan udaas

kin manziloñ luTe haiñ mohabbat ke qāfile
insāñ zamīñ pe aaj ġharīb-ul-vatan sā hai

qaum ke haq meñ jo bhī tajāvīz thiiñ iltavā meñ rahīñ
jin meñ zaatī mafādāt the un pe fauran 'amal ho gayā

vo phuul sar chaḌhā jo chaman se nikal gayā
izzat use milī jo vatan se nikal gayā

vahī jiine kī āzādī vahī marne kī jaldī hai
divālī dekh lī ham ne dasahre kar liye ham ne

maiñ bahut kamzor thā is mulk meñ hijrat ke baad
par mujhe is mulk meñ kamzor-tar us ne kiyā

samundar paar aa baiThe magar kyā
na.e mulkoñ meñ ban jaate haiñ ghar kyā

kaun kahtā hai ki phir ḳhaak se uThte haiñ shahīd
sar uThā sakte haiñ maare tirī talvāroñ ke

leaderī chāho to lafz-e-qaum hai mehmāñ-navāz
gap-navīsoñ ko aur ahl-e-mez ko raazī karo

kaun mar kar dobāra zinda huā
kaun mulk-e-fanā se lauTā hai

siine se hamārā dil na le jaao
chhuḌvāte ho kyuuñ vatan kisī kā

ye savād-e-shahr aur aisā kahāñ husn-e-malīh
shash-jihat meñ mulk dekhā hī nahīñ punjab sā

qātil tirī galī bhī badaun se kam nahīñ
jis ke qadam qadam pe mazār-e-shahīd hai