Yaad Shayari

kitne nādāñ haiñ tire bhūlne vaale ki tujhe
yaad karne ke liye umr paḌī ho jaise

sunā hai vo mire baare meñ sochtā hai bahut
ḳhabar to hai hī magar mo'tabar zyāda nahīñ

sayyād terā ghar mujhe jannat sahī magar
jannat se bhī sivā mujhe rāhat chaman meñ thī

dam liyā thā na qayāmat ne hanūz
phir tirā vaqt-e-safar yaad aayā

mujhe ḳharāb kiyā us ne haañ kiyā hogā
usī se pūchhiye mujh ko ḳhabar ziyāda nahīñ

koī vīrānī sī vīrānī hai
dasht ko dekh ke ghar yaad aayā

mai-ḳhāne meñ kyuuñ yād-e-ḳhudā hotī hai aksar
masjid meñ to zikr-e-mai-o-mīnā nahīñ hotā

is zindagī meñ itnī farāġhat kise nasīb
itnā na yaad aa ki tujhe bhuul jaa.eñ ham

duniyā ne terī yaad se begāna kar diyā
tujh se bhī dil-fareb haiñ ġham rozgār ke

raat yuuñ dil meñ tirī khoī huī yaad aa.ī
jaise vīrāne meñ chupke se bahār aa jaa.e

maiñ ne majnūñ pe laḌakpan meñ 'asad'
sang uThāyā thā ki sar yaad aayā

zamāna saḳht kam-āzār hai ba-jān-e-asad
vagarna ham to tavaqqo zyāda rakhte haiñ

na itnā zulm kar ai chāñdnī bahr-e-ḳhudā chhup jā
tujhe dekhe se yaad aatā hai mujh ko māhtāb apnā

''aap kī yaad aatī rahī raat bhar''
chāñdnī dil dukhātī rahī raat bhar

uThā sakte nahīñ jab chuum kar hī chhoḌnā achchhā
mohabbat kā ye patthar is daf.a bhārī ziyāda hai

ḳhush-hāl ghar sharīf tabī.at sabhī kā dost
vo shaḳhs thā ziyāda magar aadmī thā kam

yaad aa.ī hai to phir TuuT ke yaad aa.ī hai
koī guzrī huī manzil koī bhūlī huī dost

tum se chhuT kar bhī tumheñ bhūlnā āsān na thā
tum ko hī yaad kiyā tum ko bhulāne ke liye

rahtā nahīñ huuñ bojh kisī par ziyāda der
kuchh qarz thā agar to adā bhī huā huuñ maiñ

us ko bhī yaad karne kī fursat na thī mujhe
masrūf thā maiñ kuchh bhī na karne ke bāvajūd

dil-girafta hī sahī bazm sajā lī jaa.e
yād-e-jānāñ se koī shaam na ḳhālī jaa.e

thak gayā hai dil-e-vahshī mirā fariyād se bhī
jī bahaltā nahīñ ai dost tirī yaad se bhī

jiinā taḌap taḌap kar marnā sisak sisak kar
fariyād ek jī hai kyā kyā ḳharābiyoñ meñ

aql ko tanqīd se fursat nahīñ
ishq par a.amāl kī buniyād rakh