aadmi ban ke miraa aadamiyon mein rahnaa — Anwar Shuoor

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

zamaane ke jhamelon se mujhe kyaa
miri jaan! main tumhaaraa aadmi huun

divaar-e-zindaan ke pichhe
jurm-e-mohabbat mein baiThaa huun

miri hayaat hai bas raat ke andhere tak
mujhe havaa se bachaae rakho savere tak

kabhi rotaa thaa us ko yaad kar ke
ab aksar be-sabab rone lagaa huun

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

ham faqiron mein raaja ki chauki chaDhe kaahinon mein payambar pukaare gae
din nikalne kaa bhi vaaqia hai koi yaa abhi tak dhari ki dhari raat hai

ulfat to dekhiye miri didaar ke sabab
darvesh ban ke yaar ki chaukhaT pe aa gayaa

dil de na de magar ye tiraa husn-e-be-misaal
vaapas na kar faqir ko aakhir badan to hai

vaah kyaa raah dikhaai hai hamein murshid ne
kar diyaa kaabe ko gum aur kalisaa na milaa

milti nahin hai naav to darvesh ki tarah
khud mein utar ke paar utar jaanaa chaahiye

khudaavandaa ye tere saada-dil bande kidhar jaaein
ki darveshi bhi ayyaari hai sultaani bhi ayyaari