ba-juz us ke 'ehsaan' ko kyaa samajhiye — Ehsan Danish Kandhlvi

kuchh log jo savaar hain kaaghaz ki naav par
tohmat taraashte hain havaa ke dabaav par

tum saada-mizaaji se miTe phirte ho jis par
vo shakhs to duniyaa mein kisi kaa bhi nahin hai

main hairaan huun ki kyuun us se hui thi dosti apni
mujhe kaise gavaara ho gai thi dushmani apni

log yuun dekh ke hans dete hain
tu mujhe bhuul gayaa ho jaise

shorish-e-ishq mein hai husn baraabar kaa sharik
soch kar jurm-e-tamannaa ki sazaa do ham ko

kis kis ki zabaan rokne jaaun tiri khaatir
kis kis ki tabaahi mein tiraa haath nahin hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

aap aae to bahaaron ne luTaai khushbu
phuul to phuul the kaanTon se bhi aai khushbu

kaam us ke lab se hai mujhe bint-ul-inab se kyaa
hai aab-e-zindagi bhi to le jaae murda-sho

roz-e-jazaa gila to kyaa shukr-e-sitam hi ban paDaa
haae ki dil ke dard ne dard ko dil banaa diyaa