kaise use pata ho ki mamtaa 'azim hai — Faisal Qadri Gunnauri

us ne jab se haath pakaDnaa chhoD diyaa
tab se ham ne saath mein chalnaa chhoD diyaa

tum jo chaaho vo karte phirte ho
saari paabandiyaan hami par hain

teraa aaina kah rahe hain mujhe
meri tasvir dekhne vaale

ab zindagi se koi bhi shikva nahin mujhe
tu mil gayaa to koi tamanna nahin mujhe

dil kaa mire parinda tumhaare qafas mein thaa
jab tak tumhaaraa haath miri dastaras mein thaa

ai chaaraagar ye kaisi hain davaaein
miri taklif baDhti jaa rahi hai

main baDaa ho gayaa huun magar bachpanaa
mere dil se kabhi bhi gayaa hi nahin

dil kuchh der machaltaa hai phir yaadon mein yuun kho jaataa hai
jaise koi ziddi bachcha rote rote so jaataa hai

dev pari ke qisse sun kar
bhuke bachche so lete hain

baDi hasrat se insaan bachpane ko yaad kartaa hai
ye phal pak kar dobaara chaahtaa hai khaam ho jaae

mai ko jo istilaah mein kahte hain dukht-e-raz
vo mughbacha hai rindon kaa saalaa kahein jise

kisi bachche se pinjraa khul gayaa hai
parindon ki rihaai ho rahi hai