mire aqab mein hai aavaaza-e-numu ki guunj — Ishrat Zafar

vo mere raaz mujh mein chaahtaa hai munkashif karnaa
mujhe mere ghane saae mein tanhaa chhoD jaataa hai

jidhar bhi jaataa hai vo shola-e-bahaar-sarisht
duaaein detaa hai amboh-e-kushtgaan us ko

chashma-e-aab-e-ravaan hai jo saraab-e-jaan mein
us ki har lahr mein raqsaan hai tarannum teraa

vo ik lamha jo tere qurb ki khushbu se hai raushan
ab is lamhe ko paaband-e-salaasil chaahtaa huun main

chaar jaanib chikhti samton kaa shor
haanpte saae thakan aur inhitaat

mire kamre ki divaaron mein aise aaine bhi hain
ki jin ke paas har shakhs apnaa chehraa chhoD jaataa hai

gham hai na ab khushi hai na ummid hai na yaas
sab se najaat paae zamaane guzar gae

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

pyaaso raho na dasht mein baarish ke muntazir
maaro zamin pe paanv ki paani nikal paDe