main itni raushni phailaa chukaa huun — Mahshar Badayuni

ham ko bhi khush-numaa nazar aai hai zindagi
jaise saraab duur se dariyaa dikhaai de

ab havaaein hi kareingi raushni kaa faisla
jis diye mein jaan hogi vo diyaa rah jaaegaa

jis ke liye bachcha royaa thaa aur ponchhe the aansu baabaa ne
vo bachcha ab bhi zinda hai vo mahngaa khilaunaa TuuT gayaa

har patti bojhal ho ke giri sab shaakhein jhuk kar TuuT gaiin
us baarish hi se fasl ujDi jis baarish se tayyaar hui

abhi sar kaa lahu thamne na paayaa
udhar se ek patthar aur aayaa

kare dariyaa na pul mismaar mere
abhi kuchh log hain us paar mere

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

jo maraa hai haadse mein miraa us se kyaa thaa rishta
ye saDak jo khuun mein tar hai mujhe kyuun pukaarti hai

raat ko khvaab bahut dekhe hain
aaj gham kal se zaraa halkaa hai

tamaam umr jo hanstaa hi rah gayaa yaaro
balaa kaa dard thaa us shakhs ki kahaani mein