ye aab-dida Thahar jaae jhiil ki surat — Mustafa Shahab

aisaa bhi kabhi ho main jise khvaab mein dekhun
jaagun to vahi khvaab ki taabir bataae

zehn mein yaad ke ghar TuTne lagte hain 'shahaab'
log ho jaate hain ji ji ke puraane kitne

ham mein aur parindon mein farq sirf itnaa hai
dast-o-paa mile ham ko baal-o-par parindon ko

bikhraa bikhraa saa saaz-o-saamaan hai
ham kahin dil kahin aqida kahin

shaayad vo bhuli-bisri na ho aarzu koi
kuchh aur bhi kami si hai teri kami ke saath

kahaa thaa main ne kho kar bhi tujhe zinda rahungaa
vo aisaa jhuuT thaa jis ko nibhaanaa paD gayaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

ghurur bhi jo karun main to aajizi ho jaae
khudi mein lutf vo aae ki be-khudi ho jaae

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe