ik ghar banaa ke kitne jhamelon mein phans gae — Riaz Majeed

vaqt khush khush kaaTne kaa mashvara dete hue
ro paDaa vo aap mujh ko hausla dete hue

simaTti phailti tanhaai sote jaagte dard
vo apne aur mire darmiyaan chhoD gayaa

isi hujum mein laD-bhiD ke zindagi kar lo
rahaa na jaaegaa duniyaa se duur jaa kar bhi

baad-e-shaam aae mahak uTThe miraa sahn riyaaz
be-mahak jhaaDiyon se raat ki raani nikle

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa