mulk to mulk gharon par bhi hai qabza us kaa — Zia Zameer

us ko nae safar mein nae ham-safar ke saath
dil khush huaa hai kyon ye ziyaa dekhte hue

koi aasaan hai bhalaa rishte ko qaaem rakhnaa
girti divaar hai ham jis ko sambhaale hue hain

tujh se kahaa thaa khushbuein us ke badan ki laaiyo
meraa ye kaam aaj tak tu ne sabaa nahin kiyaa

zindagi rok ke aksar yahi kahti hai mujhe
tujh ko jaanaa thaa kidhar aur kidhar aa gayaa hai

mahfil mere dam se mahfil phir bhi mujh mein
ek bhayaanak tanhaai bhi poshida hai

daanaaon ne ki daanaai muund liin aankhein
chauraahe par qatl huaa paagal ne dekhaa

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

kabhi to shahidon ki qabron pe aao
ye sab ghar tumhaare basaae hue hain

tum aao marg-e-shaadi hai na aao marg-e-naakaami
nazar mein ab rah-e-mulk-e-adam yuun bhi hai aur yuun bhi

rahzanon se mat Daro tum paarsaaon se bachcho
leadaraan-e-qaum ki zaalim adaaon se Daro

ai khaak-e-vatan tujh se main sharminda bahut huun
mahngaai ke mausam mein ye tyauhaar paDaa hai

shahidon kaa tire shohra zamin se aasmaan tak hai
falak se balki aage baDh ke tere aastaan tak hai