Barish Shayari Collection

mar gae pyaas ke maare to uThaa abr-e-karam
bujh gai bazm to ab shama jalaataa kyaa hai

be-abr rind piite nahin vaaizo sharaab
karte hain ye gunaah bhi rahmat ke zor par

itne ghane baadal ke pichhe
kitnaa tanhaa hogaa chaand

vo mujh ko chhoD ke jis aadmi ke paas gayaa
baraabari kaa bhi hotaa to sabr aa jaataa

teraa ghar aur meraa jangal bhigtaa hai saath saath
aisi barsaatein ki baadal bhigtaa hai saath saath

dil miraa zulf seti chhuT phansaa abru mein
kufr kuun tark kiyaa maail-e-mehraab huaa

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

baarish ki bahut tez havaa mein kahin mujh ko
darpesh thaa ik marhala jalne ki tarah kaa

abr barse to inaayat us ki
shaakh to sirf duaa karti hai

roza-daaraan-e-judaai kuun kham-e-abru-e-yaar
maah-e-id-e-ramazaan thaa mujhe maalum na thaa

yuun barasti hain tasavvur mein puraani yaadein
jaise barsaat ki rim-jhim mein samaan hotaa hai

sabza o gul kahaan se aae hain
abr kyaa chiiz hai havaa kyaa hai

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

us ko aanaa thaa ki vo mujh ko bulaataa thaa kahin
raat bhar baarish thi us kaa raat bhar paighaam thaa

khudaa ke haath hai biknaa na biknaa mai kaa ai saaqi
baraabar masjid-e-jaame ke ham ne ab dukaan rakh di

'ghaalib' chhuTi sharaab par ab bhi kabhi kabhi
piitaa huun roz-e-abr o shab-e-maahtaab mein

ab bhi barsaat ki raaton mein badan TuTtaa hai
jaag uThti hain ajab khvaahishein angDaai ki

aae kuchh abr kuchh sharaab aae
is ke baa'd aae jo azaab aae

duur tak chhaae the baadal aur kahin saaya na thaa
is tarah barsaat kaa mausam kabhi aayaa na thaa

tiri abru hai mehraab-e-mohabbat
namaaz-e-ishq mere par hui farz

taaza rakh aab-e-mehrbaani siin
ek dil sau chaman baraabar hai

masjid abru mein teri mardumuk hai jiyun imaam
mu-e-mizhgaan muqtadi ho mil ke karte hain namaaz

ik dhuup si tani hui baadal ke aar-paar
ik pyaas hai ruki hui jharne ke baavajud

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

chaand ne taan li hai chaadar-e-abr
ab vo kapDe badal rahi hogi