aankh mein aansu kaa aur dil mein lahu kaa kaal hai — Akbar Hyderabadi

charaagh-e-raahguzar laakh taabnaak sahi
jalaa ke apnaa diyaa raushni makaan mein laa

raste hi mein ho jaati hain baatein bas do-chaar
ab to un ke ghar bhi jaanaa kam kam hotaa hai

dil dabaa jaataa hai kitnaa aaj gham ke baar se
kaisi tanhaai Tapakti hai dar o divaar se

rut badli to zamin ke chehre kaa ghaaza bhi badlaa
rang magar khud aasmaan ne badle kaise kaise

pahunch ke jo sar-e-manzil bichhaD gayaa mujh se
vo ham-safar thaa magar ham-nazar na thaa meraa

miri shikast bhi thi meri zaat se mansub
ki meri fikr kaa har faisla shuuri thaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

main apne saae mein baiThaa thaa kitni sadiyon se
tumhaari dhuup ne divaar toD di meri

ab miraa dard miri jaan huaa jaataa hai
ai mire chaaragaro ab mujhe achchhaa na karo

saari duniyaa ke masaail yuun mujhe darpesh hain
teraa gham kaafi na ho jaise guzar-auqaat ko