mukhtasar apni hadis-e-zist ye hai ishq mein — Anand Narayan Mulla

shama ik mom ke paikar ke sivaa kuchh bhi na thi
aag jab tan mein lagaai hai to jaan aai hai

ishq mein vo bhi ek vaqt hai jab
be-gunaahi gunaah hai pyaare

main faqat insaan huun hindu musalmaan kuchh nahin
mere dil ke dard mein tafriq-e-imaan kuchh nahin

kahne ko lafz do hain ummid aur hasrat
in mein nihaan magar ik duniyaa ki daastaan hai

us ik nazar ke bazm mein qisse bane hazaar
utnaa samajh sakaa jise jitnaa shuur thaa

nizaam-e-mai-kada saaqi badalne ki zarurat hai
hazaaron hain safein jin mein na mai aai na jaam aayaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

bandishein ishq mein duniyaa se niraali dekhein
dil taDap jaae magar lab na hilaae koi

murattab kar gayaa ik ishq kaa qaanun duniyaa mein
vo divaane hain jo majnun ko divaana bataate hain

kisi se ishq karnaa aur is ko baa-khabar karnaa
hai apne matlab-e-dushvaar ko dushvaar-tar karnaa