yaad rakhnaa bhi ik ibaadat hai — Ashhad Bilal Ibn

aao to mere sahn mein ho jaae raushni
muddat guzar gai hai charaaghaan kiye hue

ik lafz yaad thaa mujhe tark-e-vafaa magar
bhulaa huaa huun Thokarein khaane ke baa'd bhi

zindagi ki haqiqat ajab ho gai
aaj kal ho rahi hai basar khvaab mein

hosh-o-havaas khone lagaa huun firaaq mein
tanhaaiyon ne aisaa muqaffal kiyaa mujhe

tamaam din ki mashaqqat-bhari takaan ke baad
tamaam raat mohabbat se phir jagaaun use

saveraa le ke aataa hai mire khvaabon ki taabirein
magar jab shaam hoti hai to un ki yaad aati hai

mere khvaabon ke jharokon ko sajaate rahiye
na sahi vasl magar yaad to aate rahiye

kar kuchh aisaa ki tujhe yaad rakhun
bhuul jaane kaa taqaazaa hi sahi

ishq ki choT kaa kuchh dil pe asar ho to sahi
dard kam ho yaa ziyaada ho magar ho to sahi

is se baDh kar tiri yaadon ki karun kyaa taazim
teri yaadon mein zamaane ko bhulaa rakkhaa hai

na toDo dil ki hai kaaba kaa Dhaanaa
ye do ghar hain magar buniyaad hai ek

bas nahin chaltaa hai varna apne mar jaane ke saath
pheink dete khod kar duniyaa ki sab buniyaad ham