aazaadiyon kaa haq na adaa ham se ho sakaa — Natiq Lakhnavi

miri jaanib se un ke dil mein kis shikve pe kiina hai
vo shikva jo zabaan par kyaa abhi dil mein nahin aayaa

sadqe tire hote hain suraj bhi sitaare bhi
ham kis se kahein dil hai siine mein hamaare bhi

mar mar ke agar shaam to ro ro ke sahar ki
yuun zindagi ham ne tiri duuri mein basar ki

ibtidaa se aaj tak 'naatiq' ki ye hai sarguzisht
pahle chup thaa phir huaa divaana ab behosh hai

dil hai kis kaa jis mein armaan aap kaa rahtaa nahin
farq itnaa hai ki sab kahte hain main kahtaa nahin

dil rahe yaa na rahe zakhm bhare yaa na bhare
chaarasaazon ki khushaamad mujhe manzur nahin

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

har gadaa gosha-e-qanaaat mein
shaah hai mulk-e-be-niyaazi kaa

agar mazhab khalal-andaaz hai mulki maqaasid mein
to shaikh o barhaman pinhaan rahein dair o masaajid mein

yahaan na peT hi is shaaeri se bhartaa hai
yahaan na qaum hi lauh-o-qalam se jaagti hai

ham khuun ki qistein to kai de chuke lekin
ai khaak-e-vatan qarz adaa kyuun nahin hotaa

ghar to kyaa ghar kaa nishaan bhi nahin baaqi 'safdar'
ab vatan mein kabhi jaaeinge to mehmaan honge