na jaane ham se gila kyuun hai tishna-kaamon ko — Zaheer Siddiqui

itne chehron mein mujhe hai ek chehre ki talaash
jis ko main ne kho ke paayaa paa ke khoyaa subh tak

jaise jaise aagahi baDhti gai vaise 'zahir'
zehn o dil ik dusre se munfasil hote gae

zarre zarre mein bikhar jaanaa hai takmil-e-hayaat
mujh ko ye zebaa nahin ab zaat mein simTaa rahun

dard to zakhm ki paTTi ke haTaane se uThaa
aur kuchh aur bhi marham ke lagaane se uThaa

us ke alfaaz-e-tasalli ne rulaayaa mujh ko
kuchh ziyaada hi dhuaan aag bujhaane se uThaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa