Ghazal

"ulTe vo shikve karte hain aur kis adaa ke saath be-taaqati ke taane hain uzr-e-jafaa ke saath bahr-ayaadat aae vo lekin qazaa ke saath dam hi nikal gayaa miraa aavaaz-e-paa ke saath be-parda ghair paas use baiThaa na dekhte uTh jaate kaash ham bhi jahaan se hayaa ke saath vo laala-ru gayaa na ho gulgasht-e-baagh ko kuchh rang bu-e-gul ke evaz hai sabaa ke saath us ki gali kahaan ye to kuchh baagh-e-khuld hai kis jaae mujh ko chhoD gai maut laa ke saath aati hai bu-e-daagh-e-shab-e-taar hijr mein siina bhi chaak ho na gayaa ho qabaa ke saath gulbaang kis kaa mashvara-e-qatl ho gayaa kuchh aaj bu-e-khun hai vahaan ki havaa ke saath the vaade se phir aane ke khush ye khabar na thi hai apni zindagaani usi bevafaa ke saath kuche se apne ghair kaa munh hai miTaa sake aashiq kaa sar lagaa hai tire naqsh-e-paa ke saath allaah re gumrahi but o but-khaana chhoD kar 'momin' chalaa hai kaabe ko ik paarsaa ke saath"

"vaade ki jo saaat dam-e-kushtan hai hamaaraa jo dost hamaaraa hai so dushman hai hamaaraa ye kaah-e-rubaa se bhi hain kam ai kashish-e-dil mazkur kuchh aisaa pas-e-chilman hai hamaaraa afsos mu-e-sham-e-shab-e-vasl ki maanind jo qahqaha shaadi hai so shevan hai hamaaraa mahtaab kaa kyaa rang kiyaa dud-e-fughaan ne ahvaal shab-e-taar se raushan hai hamaaraa detaa nahin us zof pe bhi josh-e-junun chain har reg-e-ravaan dasht mein tausan hai hamaaraa tafrih na kyunkar ho havaa aa nahin sakti goyaa dar o divaar nasheman hai hamaaraa gar paas hai logon kaa to aa jaa ki qalaq se hai laash kahin aur kahin madfan hai hamaaraa jazb-e-dil use khinch ke laae to kahaan laae jo ghair kaa ghar hai vahi maskan hai hamaaraa but-khaane se kaabe ko chale rashk ke maare 'momin' khizr-e-raah barhaman hai hamaaraa"

"saudaa thaa balaa-e-josh par raat bistar pe bichhaae neshtar raat bigDe the yahaan vo aan kar raat be-taur bani thi jaan par raat ham taa-sahar aap mein nahin the kyaa jaane rahe vo kis ke ghar raat afsaana samajh ke so gae vo kaam aai fughaan-e-be-asar raat aaine mein ho na mom jaadu sote nahin ab vo taa-sahar raat taare aankhein jhapak rahe the thaa baam pe kaun jalva-gar raat andher paDaa zamaane mein haae ne din ko hai mehr ne qamar raat is lail-o-nahaar-e-gham ne maaraa hai roz se siyaah-tar raat kyaa puchho ho munkar-o-nakir aah bigDe jo vo taan-e-ghair par raat ye baat baDhi ki mar gae ham maut aai thi qissa mukhtasar raat is ghar mein hai aish-e-khuld 'momin' kyaa jaane kahaan hai din kidhar raat"

"jo tere munh se na ho sharmsaar aaina to rukh kare su-e-aaina-daar aaina kahe hai dekh ke rukhsaar-e-yaar aaina ki is safaai pe sadqe nisaar aaina siyaah-ru na kare tark-e-ulfat-e-gulfaam main bul-havas ko dikhaaun hazaar aaina safaa-e-dil ki kahaan qadr-e-tira-rozi mein charaagh-e-subh hai shab-haa-e-taar aaina samajh liyaa magar is sabz rang ko tuuti ki hai nazaare kaa ummid-vaar aaina vo sakht-jaan huun ki dikhlaaein gar dam-e-murdan to toD de kamar-e-kohsaar aaina muqaabil us rukh-e-raushan ke khul gai qali na Thahraa aag pe simaab-vaar aaina samaa rahe hain magar tere nau-ba-nau jalve ki ban gayaa hai tilism-e-bahaar aaina shikast-e-rang pe masti mein hanste hain ham bhi dikhaaeinge unhein vaqt-e-khumaar aaina mujhe to kahte ho mat dekh meri jaanib tu aur aap dekhte ho baar baar aaina balaa hai man-e-vafaa nuur uD gayaa naaseh tu le ke dekh to rang-e-azaar aaina samajh tu 'momin' agar naaravaa ho khud-bini to dekhein kaahe ko parhez-gaar aaina"

"ghussa begaana-vaar honaa thaa bas yahi tujh se yaar honaa thaa kyaa shab-e-intizaar honaa thaa naahaq ummid-vaar honaa thaa kyuun na hote aziiz ghair tumhein meri qismat mein khvaar honaa thaa mujh se jannat mein vo sanam na milaa hashr aur ek baar honaa thaa gar na thi ai dil us ke ranj ki taab kyuun shikaayat-guzaar honaa thaa khaak hotaa na main to kyaa kartaa us ke dar kaa ghubaar honaa thaa harza-gardi se ham zalil hue charkh kaa e'tibaar honaa thaa marg-e-shaam-e-visaal-e-hirmaan hai subh-dam jaan-nisaar honaa thaa aur se ham-kanaar hai dushman aaj to ham-kanaar honaa thaa shikva-e-dahr par kahaa tum ko aafat-e-rozgaar honaa thaa chashm-e-be-ikhtiyaar-e-jaanaan mein kyaa miraa ikhtiyaar honaa thaa sabr kar sabr ho chukaa jo kuchh ai dil-e-be-qaraar honaa thaa ku-e-dushman mein jaa pakaDtaa kyuun kyaa mujhe sharmsaar honaa thaa vo namak-paash bhi nahin hote yuun hi dil ko figaar honaa thaa khaak mein haif ye sharaab mile mohtasib baada-khvaar honaa thaa na gayaa tir-e-naala su-e-raqib murgh-e-arshi shikaar honaa thaa raat din baada o sanam 'momin' kuchh to parhez-gaar honaa thaa"

"agar ghaflat se baaz aayaa jafaa ki talaafi ki bhi zaalim ne to kyaa ki mare aaghaaz-e-ulfat mein ham afsos use bhi rah gai hasrat jafaa ki kabhi insaaf hi dekhaa na didaar qayaamat aksar us ku mein rahaa ki falak ke haath se main jaa chhupun gar khabar laa de koi tahtus-saraa ki shab-e-vasl-e-adu kyaa kyaa jalaa huun haqiqat khul gai roz-e-jazaa ki chaman mein koi us ku se na aayaa gai barbaad sab mehnat sabaa ki kushaad-e-dil pe baandhi hai kamar aaj nahin hai khairiyat band-e-qabaa ki kiyaa jab iltifaat us ne zaraa saa paDi ham ko husul-e-muddaaa ki kahaa hai ghair ne tum se miraa haal kahe deti hai bebaaki adaa ki tumhein shor-e-fughaan se mere kyaa kaam khabar lo apni chashm-e-surma-saa ki diyaa ilm o hunar hasrat-kashi ko falak ne mujh se ye kaisi daghaa ki gham-e-maqsad-rasi taa nazaa aur ham ab aai maut bakht-e-naa-rasaa ki mujhe ai dil tiri jaldi ne maaraa nahin taqsir us der-aashnaa ki jafaa se thak gae to bhi na puchhaa ki tu ne kis tavaqqo par vafaa ki kahaa us but se martaa huun to 'momin' kahaa main kyaa karun marzi khudaa ki"

"na intizaar mein yaan aankh ek aan lagi na haae haae mein taalu se shab zabaan lagi jalaa jigar tap-e-gham se phaDakne jaan lagi ilaahi khair ki ab aag paas aan lagi gali mein us ki na phir aate ham to kyaa karte tabiat apni na jannat ke darmiyaan lagi jafaa-e-ghair kaa shikva thaa teraa thaa kyaa zikr abas ye baat buri tujh ko bad-gumaan lagi hanso na tum to mire haal par main huun vo zalil ki jis ki zillat-o-khvaari se tum ko shaan lagi kahaan vo aah-o-fughaan dam bhi le nahin sakte hamein ye teri duaa-e-bad aasmaan lagi main aur us ko bulaaungaa roz-e-vasl mein lo ajal bhi karne mohabbat kaa imtihaan lagi ba-rang-e-surat-e-bulbul nahin navaa-sanji ye kyaa huaa ki chup ai gulsitaan bayaan lagi sadaa tumhaari taraf ji lagaa hi rahtaa hai tumhaare vaaste hai dil ko mehrbaan lagi vo kina-tuz thaa 'momin' to dil lagaayaa kyuun kaho to kyaa tumhein aisi bhali vo aan lagi"

"raaz-e-nihaan zabaan-e-aghyaar tak na pahunchaa kyaa ek bhi hamaaraa khat yaar tak na pahunchaa allaah re naa-tavaani jab shiddat-e-qalaq mein baalin se sar uThaayaa divaar tak na pahunchaa rote to rahm aataa so us ke ru-ba-ru to ik qatra khuun bhi chashm-e-khun-baar tak na pahunchaa aashiq se mat bayaan kar qatl-e-adu kaa muzhda paighaam-e-marg hai ye bimaar tak na pahunchaa be-bakht rang-e-khubi kis kaam kaa ki main to thaa gulvale kisi ki dastaar tak na pahunchaa muft avval-e-sukhan mein aashiq ne jaan de di qaasid bayaan teraa iqraar tak na pahunchaa thi khaar raah teri mizhgaan ki yaad phir shab taa-subh khvaab chashm-e-bedaar tak na pahunchaa bakht-e-rasaa adu ke jo chaahe so kahe ab yak baar yaar mujh tak main yaar tak na pahunchaa ghairon se us ne hargiz chhoDi na haathaa-paai jab tak ajal kaa sadma do-chaar tak na pahunchaa 'momin' usi ne mujh se di bartari kisi ko jo past-fahm mere ashaar tak na pahunchaa"

"shokh kahtaa hai be-hayaa jaanaa dekho dushman ne tum ko kyaa jaanaa shola-e-dil ko naaz-e-taabish hai apnaa jalva zaraa dikhaa jaanaa shauq ne durbaash-e-aadaa ko us ki mahfil mein marhabaa jaanaa us ke uThte hi ham jahaan se uThe kyaa qayaamat hai dil kaa aa jaanaa ghar mein khud-raftagi se dhuum machi kyunke ho us talak miraa jaanaa puchhnaa haal-e-yaar hai manzur main ne naaseh kaa muddaaa jaanaa mai na utri gale se jo us bin mujh ko yaaron ne paarsaa jaanaa shikva kartaa hai be-niyaazi kaa tu ne 'momin' buton ko kyaa jaanaa"

"thi vasl mein bhi fikr-e-judaai tamaam shab vo aae to bhi niind na aai tamaam shab vaan taana tir-e-yaar yahaan shikva zakhm-rez baaham thi kis maze ki laDaai tamaam shab rangin hain khun-e-sar se vo haath aaj-kal rahe jis haath mein vo dast-e-hinaai tamaam shab taalu se yaan zabaan sahar tak nahin lagi thaa kis ko shughl-e-naghma-e-saraai tamaam shab yak baar dekhte hi mujhe ghash jo aa gayaa bhule the vo bhi hosh-ruhaai tamaam shab mar jaate kyuun na subh ke hote hi hijr mein taklif kaisi kaisi uThaai tamaam shab garm-e-javaab-e-shikva-e-jaur-e-adu rahaa us shola-khu ne jaan jalaai tamaam shab kahtaa hai mehr-vash tumhein kyuun ghair gar nahin din bhar hamesha vasl judaai tamaam shab dhar paanv aastaan pe ki is aarzu mein aah ki hai kisi ne naasiya-saai tamaam shab 'momin' main apne naalon ke sadqe ki kahte hain un ko bhi aaj niind na aai tamaam shab"

"imtihaan ke liye jafaa kab tak iltifaat-e-sitam-numaa kab tak ghair hai bevafaa pa tum to kaho hai iraada nibaah kaa kab tak jurm maalum hai zulekhaa kaa taana-e-dast-e-naarasaa kab tak mujh pe aashiq nahin hai kuchh zaalim sabr aakhir kare vafaa kab tak dekhiye khaak mein milaati hai nigah-e-chashm-e-surma-saa kab tak kahin aankhein dikhaa chuko mujh ko jaanib-e-ghair dekhnaa kab tak na milaaeinge vo na aaeinge josh-e-labbaik-o-marhabaa kab tak hosh mein aa tu mujh mein jaan nahin ghaflat-e-jurat-aazmaa kab tak le shab-e-vasl-e-ghair bhi kaaTi tu mujhe aazmaaegaa kab tak tum ko khu ho gai buraai ki darguzar kijiye bhalaa kab tak mar chale ab to us sanam se milein 'momin' andesha-e-khudaa kab tak"

"vaada-e-vaslat se dil ho shaad kyaa tum se dushman ki mubaarakbaad kyaa kuchh qafas mein in dinon lagtaa hai ji aashiyaan apnaa huaa barbaad kyaa naala-e-paiham se yaan fursat nahin hazrat-e-naaseh karein irshaad kyaa hain asiir us ke jo hai apnaa asiir ham na samjhe said kyaa sayyaad kyaa shokh-baazaari thi shirin bhi magar varna farq-e-khusrau-o-farhaad kyaa nashsha-e-ulfat se bhule yaar ko sach hai aisi be-khudi mein yaad kyaa naala ik dam mein uDaa Daale dhuein charkh kyaa aur charkh ki buniyaad kyaa jab mujhe ranj-e-dil-aazaari na ho bevafaa phir haasil-e-bedaad kyaa paanv tak pahunchi vo zulf-e-kham-ba-kham sarv ko ab baandhiye aazaad kyaa kyaa karun allaah sab hain be-asar valvala kyaa naala kyaa fariyaad kyaa in nasibon par kiyaa akhtar-shanaas aasmaan bhi hai sitam-ijaad kyaa roz-e-mahshar ki tavaqqo hai abas aisi baaton se ho khaatir shaad kyaa gar bahaa-e-khun-e-aashiq hai visaal intiqaam-e-zahmat-e-jallaad kyaa but-kada jannat hai chaliye be-hiraas lab pe 'momin' harche baadaa-baad kyaa"

"hai dil mein ghubaar us ke ghar apnaa na kareinge ham khaak mein milne ki tamannaa na kareinge kyunkar ye kahein minnat-e-aadaa na kareinge kyaa kyaa na kiyaa ishq mein kyaa kyaa na kareinge hans hans ke vo mujh se hi mire qatl ki baatein is tarah se karte hain ki goyaa na kareinge kyaa naame mein likkhun dil-e-vaabasta kaa ahvaal maalum hai pahle hi ki vo vaa na kareinge ghairon se shakar-lab sukhan-e-talkh bhi teraa har chand halaahil ho gavaaraa na kareinge bimaar-e-ajal-chaara ko gar hazrat-e-isaa achchhaa bhi kareinge to kuchh achchhaa na kareinge jhunjhlaate ho kyaa dijiye ik bosa dahan kaa ho jaaeinge lab band to ghaughaa na kareinge divaar ke gir paDte hi uThne lage tufaan ab baiTh ke kone mein bhi royaa na kareinge gar saamne us ke bhi gire ashk to dil se kyuun roz-e-jazaa khuun kaa daavaa na kareinge kis vaqt kiyaa mardumak-e-chashm kaa shikva ai parda-nashin ham tujhe rusvaa na kareinge naaseh kaf-e-afsos na mal chal tujhe kyaa kaam paamaal kareinge vo mujhe yaa na kareinge us ku mein Thaharne na diyaa josh-e-qalaq ne aghyaar se ham shikva-e-bejaa na kareinge gar zikr-e-vafaa se yahi ghussa hai to ab se go qatl kaa vaada ho taqaazaa na kareinge 'momin' vo ghazal kahte hain ab jis se ye mazmun khul jaae ki tark-e-dar-e-but-khaana kareinge"

"ejaaz-e-jaan-dahi hai hamaare kalaam ko zinda kiyaa hai ham ne masihaa ke naam ko likkho salaam ghair ke khat mein ghulaam ko bande kaa bas salaam hai aise salaam ko ab shor hai misaal jo di us khiraam ko yuun kaun jaantaa thaa qayaamat ke naam ko aataa hai bahr-e-qatl vo daur ai hujum-e-yaas ghabraa na jaae dekh kahin azhdahaam ko go aap ne javaab buraa hi diyaa vale mujh se bayaan na kiije adu ke payaam ko yaan vasl hai talaafi-e-hijraan mein ai falak kyuun sochtaa hai taaza sitam intiqaam ko tere samand-e-naaz ki bejaa sharaartein karte hain aag naala-e-andesha-kaam ko girye pe mere zinda-dilo hanste kyaa ho aah rotaa huun apne main dil-e-jannat-maqaam ko sah sah ke naa-durust tiri khu bigaaD di ham ne kharaab aap kiyaa apne kaam ko us se jalaa ke ghair ko ummid-e-pukhtagi lag jaae aag dil ke khayaalaat-e-khaam ko bakht-e-saped aaina-daari kare to main dikhlaaun dil ke jaur us aaina-faam ko jab tu chale janaaza-e-aashiq ke saath saath phir kaun vaarison ke sune izn-e-aam ko shaayad ki din phire hain kisi tira-roz ke ab ghair us gali mein nahin phirte shaam ko muddat se naam sunte the 'momin' kaa baare aaj dekhaa bhi ham ne us shoaraa ke imaam ko"

"sabr vahshat-asar na ho jaae kahin sahraa bhi ghar na ho jaae rashk-e-paighaam hai inaan-kash-e-dil naama-bar raahbar na ho jaae dekho mat dekhiyo ki aaina ghash tumhein dekh kar na ho jaae hijr-e-parda-nashin mein marte hain zindagi parda-e-dar na ho jaae kasrat-e-sajda se vo naqsh-e-qadam kahin paamaal-e-sar na ho jaae mere taghir-e-rang ko mat dekh tujh ko apni nazar na ho jaae mere aansu na ponchhnaa dekho kahin daamaan tar na ho jaae baat naaseh se karte Dartaa huun ki fughaan be-asar na ho jaae ai qayaamat na aaiyo jab tak vo miri gor par na ho jaae maana-e-zulm hai taghaaful-e-yaar bakht-e-bad ko khabar na ho jaae ghair se be-hijaab milte ho shab-e-aashiq sahar na ho jaae rashk-e-dushman kaa faaeda maalum muft ji kaa zarar na ho jaae ai dil aahista aah-e-taab-shikan dekh TukDe jigar na ho jaae 'momin' imaan qubul dil se mujhe vo but aazurda gar na ho jaae"

"ham samajhte hain aazmaane ko uzr kuchh chaahiye sataane ko sang-e-dar se tire nikaali aag ham ne dushman kaa ghar jalaane ko subh-e-ishrat hai vo na shaam-e-visaal haae kyaa ho gayaa zamaane ko bul-havas roe mere girye pe ab munh kahaan tere muskuraane ko barq kaa aasmaan par hai dimaagh phunk kar mere aashiyaane ko sang-e-saudaa junun mein lete hain apnaa ham maqbara banaane ko shikva hai ghair ki kudurat kaa so mire khaak mein milaane ko roz-e-mahshar bhi hosh gar aayaa jaaeinge ham sharaab-khaane ko sun ke vasf us pe mar gayaa hamdam khuub aayaa thaa gham uThaane ko koi din ham jahaan mein baiThe hain aasmaan ke sitam uThaane ko chal ke kaabe mein sajda kar 'momin' chhoD us but ke aastaane ko naqsh-e-paa-e-raqib ki mehraab nahin zebinda sar jhukaane ko"

"adam mein rahte to shaad rahte use bhi fikr-e-sitam na hotaa jo ham na hote to dil na hotaa jo dil na hotaa to gham na hotaa hui khajaalat se nafrat afzun gile kiye khuub aakhirin dam vo kaash ik dam Thahar ke aate ki mere lab par bhi dam na hotaa paDaa hi marnaa bas ab to ham ko jo us ne khat paDh ke naama-bar se kahaa ki gar sach ye haal hotaa to daftar itnaa raqam na hotaa kisi ke jalne kaa dhyaan aayaa vagarna dud-e-fughaan se mere agar hazaaron sipehr bante tumhaari aankhon mein nam na hotaa jo aap dar se uThaa na dete kahin na kartaa main jabha-saai agarche ye sarnavisht mein thaa tumhaare sar ki qasam na hotaa visaal ko ham taras rahe the jo ab huaa to mazaa na paayaa adu ke marne ki jab khushi thi ki us ko ranj-o-alam na hotaa jahaan-e-tang o hujum-e-vahshat gharaz ki dam par buri bani thi kahaan main jaataa na ji Thahartaa kahin jo dasht-e-adam na hotaa magar raqibon ne sar uThaayaa ki ye na hotaa to be-muravvat nazar se zaahir hayaa na hoti hayaa se gardan mein kham na hotaa vahaan taraqqi jamaal ko hai yahaan mohabbat hai roz-afzun sharik-e-zebaa thaa bul-havas bhi jo bevafaai mein kam na hotaa ghalat ki saane' ko ho gavaaraa kharaash-e-angusht-haa-e-naazuk javaab-e-khat ki umiid rakhte jo qaul-e-juffil-qalam na hotaa ye be-takalluf phiraa rahi hai kashish dil-e-aashiqaan ki us ko vagarna aisi nazaakaton pe khiraam-e-naaz ik qadam na hotaa visaal to hai kahaan mayassar magar khayaal-e-visaal hi mein maze uDaate havas nikalti jo saath andaaz-e-ram na hotaa huaa musalmaan main aur Dar se na dars-e-vaaiz ko sun ke 'momin' bani thi dozakh balaa se banti azaab-e-hijr-e-sanam na hotaa"

"gar ghair ke ghar se na dil-aaraam nikaltaa dam kaahe ko yuun ai dil-e-naakaam nikaltaa main vahm se martaa huun vahaan roab se us ke qaasid ki zabaan se nahin paighaam nikaltaa karte jo mujhe yaad shab-e-vasl adu tum kyaa subh ki khurshid na taa-shaam nikaltaa jab jaante taasir ki dushman bhi vahaan se apni tarah ai gardish-e-ayyaam nikaltaa har ek se us bazm mein shab puchhte the naam thaa lutf jo koi miraa hamnaam nikaltaa kyuun kaam talab hai mire aazaar se gardun naakaam se dekhaa hai kahin kaam nikaltaa thi nauha-zani dil ke janaaze pe zaruri shaayad ki vo ghabraa ke sar-e-baam nikaltaa kaanTaa saa khaTaktaa hai kaleje mein gham-e-hijr ye khaar nahin dil se gul-andaam nikaltaa hurein nahin 'momin' ke nasibon mein jo hotin but-khaane hi se kyuun ye bad-anjaam nikaltaa"

"tum bhi rahne lage khafaa saahab kahin saaya miraa paDaa saahab hai ye banda hi bevafaa saahab ghair aur tum bhale bhalaa saahab kyuun ulajhte ho jumbish-e-lab se khair hai main ne kyaa kiyaa saahab kyuun lage dene khatt-e-aazaadi kuchh gunah bhi ghulaam kaa saahab haae ri chheD raat sun sun ke haal meraa kahaa ki kyaa saahab dam-e-aakhir bhi tum nahin aate bandagi ab ki main chalaa saahab sitam aazaar zulm o jaur o jafaa jo kiyaa so bhalaa kiyaa saahab kis se bigDe the kis pe ghussa thaa raat tum kis pe the khafaa saahab kis ko dete the gaaliyaan laakhon kis kaa shab zikr-e-khair thaa saahab naam-e-ishq-e-butaan na lo 'momin' kijiye bas khudaa khudaa saahab"

"'momin' khudaa ke vaaste aisaa makaan na chhoD dozakh mein Daal khuld ko ku-e-butaan na chhoD aashiq to jaante hain vo ai dil yahi sahi har-chand be-asar hai par aah o fughaan na chhoD us tab-e-naaznin ko kahaan taab-e-infiaal jaasus mere vaaste ai bad-gumaan na chhoD naa-chaar deinge aur kisi khub-ru ko dil achchhaa tu apni khu-e-bad ai bad-zabaan na chhoD zakhmi kiyaa udu ko to marnaa muhaal hai qurbaan jaaun tere mujhe nim-jaan na chhoD kuchh kuchh durust zid se tiri ho chale hain vo yak-chand aur kaj-ravi ai aasmaan na chhoD jis kuche mein guzaar sabaa kaa na ho sake ai andalib us ke liye gulsitaan na chhoD gar phir bhi ashk aaein to jaanun ki ishq hai huqqe kaa munh se ghair ki jaanib dhuaan na chhoD hotaa hai is jahim mein haasil visaal-e-jaur 'momin' ajab bahisht hai dair-e-mughaan na chhoD"

"dil qaabil-e-mohabbat-e-jaanaan nahin rahaa vo valvala vo josh vo tughiyaan nahin rahaa ThanDaa hai garm-joshi-e-afsurdagi se ji kaisaa asar ki naala-o-afghaan nahin rahaa karte hain apne zakhm-e-jigar ko rafu ham aap kuchh bhi khayaal-e-jumbish-e-mizhgaan nahin rahaa dil-sakhtiyon se aai tabiat mein naazuki sabr-o-tahammul-e-qalaq-e-jaan nahin rahaa ghash hain ki be-dimaagh hain gul-pairahan namat az-bas dimaagh-e-itr-e-garebaan nahin rahaa aankhein na badlein shokh-nazar kyuun ke ab ki main maftun-e-lutf-e-nargis-e-fattaan nahin rahaa naakaamiyon kaa gaah gila gaah shukr hai shauq-e-visaal o anduh-e-hijraan nahin rahaa be-tuda tuda-khaak subuk-dosh ho gae sar par junun-e-ishq kaa ehsaan nahin rahaa har lahza mehr-jalvon se hain chashm-poshiyaan aaina-zaar dida-e-hairaan nahin rahaa phirte hain kaise parda-nashinon se munh chhupaae rusvaa hue ki ab gham-e-pinhaan nahin rahaa aaseb-e-chashm-e-qahr-e-pari-talataan nahin ai uns ik nazar ki main insaan nahin rahaa bekaari-e-umid se fursat hai raat din vo kaarobaar-e-hasrat-o-hirmaan nahin rahaa be-sair-e-dasht-o-baadiya lagne lagaa hai ji aur is kharaab ghar mein ki viraan nahin rahaa kyaa talkh-kaamiyon ne lab-e-zakhm si diye vo shor-e-ishtiyaaq-e-namak-daan nahin rahaa be-e'tibaar ho gae ham tark-e-ishq se az-bas ki paas-e-vaada-o-paimaan nahin rahaa niind aai hai fasaana-e-gesu-o-zulf se vahm-o-gumaan-e-khvaab-e-pareshaan nahin rahaa kis kaam ke rahe jo kisi se rahaa na kaam sar hai magar ghurur kaa saamaan nahin rahaa 'momin' ye laaf-e-ulfat-e-taqvaa hai kyuun magar dilli mein koi dushman-e-imaan nahin rahaa"

"asar us ko zaraa nahin hotaa ranj raahat-fazaa nahin hotaa bevafaa kahne ki shikaayat hai to bhi vaada-vafaa nahin hotaa zikr-e-aghyaar se huaa maa'lum harf-e-naaseh buraa nahin hotaa kis ko hai zauq-e-talkh-kaami lek jang bin kuchh mazaa nahin hotaa tum hamaare kisi tarah na hue varna duniyaa mein kyaa nahin hotaa us ne kyaa jaane kyaa kiyaa le kar dil kisi kaam kaa nahin hotaa imtihaan kijiye miraa jab tak shauq zor-aazmaa nahin hotaa ek dushman ki charkh hai na rahe tujh se ye ai duaa nahin hotaa aah tul-e-amal hai roz-fuzun garche ik muddaaa nahin hotaa tum mire paas hote ho goyaa jab koi dusraa nahin hotaa haal-e-dil yaar ko likhun kyunkar haath dil se judaa nahin hotaa rahm kar khasm-e-jaan-e-ghair na ho sab kaa dil ek saa nahin hotaa daaman us kaa jo hai daraaz to ho dast-e-aashiq rasaa nahin hotaa chaara-e-dil sivaae sabr nahin so tumhaare sivaa nahin hotaa kyuun sune arz-e-muztar-e-'momin' sanam aakhir khudaa nahin hotaa"

"aankhon se hayaa Tapke hai andaaz to dekho hai bul-havason par bhi sitam naaz to dekho us but ke liye main havas-e-hur se guzraa is ishq-e-khush-anjaam kaa aaghaaz to dekho chashmak miri vahshat pe hai kyaa hazrat-e-naaseh tarz-e-nigah-e-chashm-e-fusun-saaz to dekho arbaab-e-havas haar ke bhi jaan pe khele kam-taalai-e-aashiq-e-jaan-baaz to dekho majlis mein mire zikr ke aate hi uThe vo badnaami-e-ushshaaq kaa eazaaz to dekho mahfil mein tum aghyaar ko duz-dida nazar se manzur hai pinhaan na rahe raaz to dekho us ghairat-e-naahid ki har taan hai dipak shoala saa lapak jaae hai aavaaz to dekho dein paaki-e-daaman ki gavaahi mire aansu us yusuf-e-bedard kaa eajaaz to dekho jannat mein bhi 'momin' na milaa haae buton se jaur-e-ajal-e-tafraqa-pardaaz to dekho"

"ye uzr-e-imtihaan-e-jazb-e-dil kaisaa nikal aayaa main ilzaam us ko detaa thaa qusur apnaa nikal aayaa na shaadi-marg huun kyunkar hai muzhda qatl-e-dushman kaa ki ghar mein se liye shamshir vo rotaa nikal aayaa sitam ai garmi-e-zabt-e-fughaan-o-aah chhaati par kabhu bas paD gayaa chhaalaa kabhu phoDaa nikal aayaa kiyaa zanjir mujh ko chaara-gar ne kin dinon mein jab adu ki qaid se vo shokh-e-be-parvaa nikal aayaa nikal aayaa agar aansu to zaalim mat nikaal aankhein sunaa maazur hai muztar nikal aayaa nikal aayaa hamaare khun-bahaa kaa ghair se daavaa hai qaatil ko ye baad-e-infisaal ab aur hi jhagDaa nikal aayaa hui bulbul sanaa-khvaan-e-dahaan-e-tang kis gul ki ki farvardi mein ghunche kaa munh itnaa saa nikal aayaa koi tiir us kaa dil mein rah gayaa thaa kyaa ki aankhon se abhi rone mein ik paikaan kaa TukDaa nikal aayaa dam-e-bismil ye kis ke khauf se ham pi gae aansu ki har zakhm-e-badan se khuun kaa dariyaa nikal aayaa khadang-e-yaar ke hamraah nikli jaan siine se yahi armaan ik muddat se ji mein thaa nikal aayaa bahut naazaan hai tu ai qais par vahshat dikhaaungaa kitaabon mein kabhu qissa jo 'momin' kaa nikal aayaa"